पोखरा । गत साउन १९ गतेदेखि हराइरहेका तीन बालिकामध्ये दुई जना काठमाडौंमा रहेको खुलेको छ । बालिकालाई लिन आफन्तहरू काठमाडौं जाँदै छन् । विद्यालय जान्छु भनेर हिँडेका १३ वर्षका एक र १४ वर्षका दुई बालिकाहरू सम्पर्कमा थिएनन् ।

हराइरहेका तीन बालिकामा १४ वर्षीया मनिका परियार, १३ वर्षीया एलिसा परियार र १४ वर्षीया राधिका परियार छन् । उनीहरूमध्ये १४ वर्षीय मनिका र राधिका परियार भने परिवारको सम्पर्कमा आएका हुन् ।

मनिकाकी आमा सीता परियारका अनुसार बालिकाहरू काठमाडौं रहेको थाहा पाएपछि आफूहरू पनि काठमाडौं जाँदै गरेको बताइन् । “हिजो खबर पाएका हौँ । राधिका र मनिका काठमाडौंमा रहेछन् । हामी लिन जाँदै छौँ,” उनले भनिन् ।

मोबाइल लोकेसनका आधारमा उनीहरू काठमाडौंमा भेटिएका हुन् । बेपत्तामध्येकी अर्की बालिका एलिसा परियारको बारेमा भने खोजीकार्य जारी रहेको प्रहरीले जनाएको छ ।

आफ्ना आफन्तहरूसँगको कुराकानी गर्दा त्यहाँ पनि बालिकाहरू नभएपछि बालिकाका आफन्तहरूले प्रहरीमा उजुरी दिएका थिए ।

हराइरहेका भनिए पनि मनिका र राधिकाको भने परिवारसँग कुराकानी भइरहेको थियो । यी दुवैजना पोखराको राष्ट्रिय मावि टुँडिखेलमा अध्ययन गर्थे ।

उनीहरू काठमाडौंस्थित एक आयुर्वेदिक पसलमा कार्यरत रहेको बताइएको छ । एलिसा पनि सँगै काठमाडौं गएको र त्यसपछि सम्पर्कविहीन छन् ।

एलिसा विन्ध्यावासिनी माविमा अध्ययनरत थिइन् ।

परिवारका अनुसार उनीहरू हराउँदा बखत तीनैजना सेतो सट, निलो स्कटको स्कुल ड्रेसमा थिए । परिवारले घरबाट स्कुल जान्छु भनी हिँडेका र हालसम्म घरमा फर्की नआएका, आफन्त, स्टमित्रसमेतको सम्पर्कमा नआएकी हुँदा खोजतलास गरी पाँउ भन्दै जिल्ला प्रहरी कार्यालयमा उजुरी दिएका थिए ।