मुगु । मुगुमा भएको जीप दुर्घटनामा मृत्यु हुनेको संख्या पाँच पुगेको छ । उपचारका लागि अस्पताल लैजाँदै गर्दा एक घाइतेको बाटोमै मृत्यु भएको प्रहरीले जनाएको छ । 

सोमबार भएको दुर्घटनामा परी घाइते भएका सोरु गाउँपालिका–५ का वडा सदस्य लोकजंग नेपालीको बाटोमै मृत्यु भएको स्वास्थ्य सेवा कार्यालयका निमित्त कार्यालय प्रमुख कमल ढुंगानाले जानकारी दिए ।

उपचारका लागि जिल्ला अस्पताल मुगुतर्फ ल्याइँदै गर्दा घाइते नेपालीको बाटोमै मृत्यु भएको हो ।

जिल्ला प्रहरी कार्यालय मुगुका प्रहरी नायब उपरीक्षक महेश बस्नेतका अनुसार दुर्घटनामा परी यसअघि हुम्लाको सर्केगाड गाउँपालिका–२, रिपगाउँका राम परियार, प्रकाश बोहोरा, अर्का राम परियार र पिउस परियारको मृत्यु भएको थियो ।

सोरु गाउँपालिकाबाट मुगुको सदरमुकाम गमगढीतर्फ आउँदै गरेको ग१ज ७७६२ नम्बरको जीप सोमबार अपराह्न ४ बजे सोरु–७, चिप्लेगाडामा दुर्घटना भएको थियो । जीप सडकबाट २०० मिटर तल छेउमा खसेको प्रहरीले जनाएको छ । रासस