विराटनगर । विराटनगर महानगरपालिकामा डेंगीको निःशुल्क परीक्षण गर्ने प्रबन्ध मिलाइएको छ । महानगरअन्तर्गतको रानी र वैजनाथपुर स्वास्थ्य केन्द्रमा किटबाट निःशुल्क परीक्षण गर्ने व्यवस्था मिलाइएको हो ।

महानगरको स्वास्थ्य महाशाखा प्रमुख हैदर अलीले विराटनगरमा समेत फाट्टफुट्ट संक्रमित फेला पर्न थालेकोले यसको परीक्षण निःशुल्क गर्ने तयारी गरिएको बताए ।

यसअघि, निजी स्वास्थ्य संस्थाले डेंगी किटबाट परीक्षण गर्दा ६०० रुपैयाँभन्दा बढी शुल्क लिन नपाउने निर्णय गरिएको महागनरका मेयर नागेश कोइरालाले बताए ।

“महानगरसित भएको स्रोत साधनबाट महानगरबासीलाई अधिकतम सेवा दिने हाम्रो उद्देश्य रहेको छ,” मेयर कोइरालाले भने, “तत्कालका लागि महानगरपालिका मातहत रहेको रानी अस्पताल र वैजनाथपुर अस्पतालमा डेंगीको निःशुल्क परीक्षण गर्ने व्यवस्था मिलाएका छौँ ।”

महानगरले हरेक शुक्रबार डेंगी खोज र नष्ट गर अभियानसमेत सञ्चालन गर्दै आएको छ । हरेक शुक्रबार बिहान ७ देखि ९ बजेसम्म १९ वटै वडामा यस्तो अभियान संचलन हुँदै आएको महानगरले जनाएको छ ।