काठमाडौं । राजस्व अनुसन्धान विभागले एक क्विनटल सुन प्रकरणबारे अनुसन्धान गर्न प्रहरीको केन्द्रीय अनुसन्धान ब्यूरो (सीआईबी)लाई जिम्मा लगाएको छ । विभागले हालसम्म गरेको अनुसन्धान फाइल र पक्राउ परेका आरोपितलाईसमेत सीआईबीको जिम्मा लगाएको हो ।

३ साउनमा विभागको टोलीले त्रिभुवन विमानस्थल भन्सार पास गरेर बाहिरिँदै गरेको मोटरपार्ट्सभित्र लुकाएको करिब एक क्विनटल सुन बरामद गरेको थियो । हालसम्म सो प्रकरणमा विभागको टोलीले १८ जनालाई पक्राउ गरेको छ ।

जसमध्ये एकजना भने हाजिरी जमानीमा छुटेका छन् । विभागले सुन तस्करी प्रकरणमा अन्तरदेशीय अपराध र संगठित रूपमा तस्करी भएको देखिएपछि थप अनुसन्धानको जिम्मा सीआईबीलाई दिएको हो ।

सीआईबीकी प्रमुख एआईजी किरण बज्राचार्यले विभागले अनुसन्धान फाइल र सबै आरोपितको जिम्मा आफूहरूलाई लगाएको बताए । 

"अनुसन्धानका लागि हालसम्म भएका सबै फाइल र आरोपितहरूलाई हामीले ल्याएका छौँ । अब सबै कोणबाट हामी अनुसन्धान गर्छौं," बज्राचार्यले भने ।