काठमाडौं । अर्जेन्टिनी कप्तान लियोनल मेसीले गोलको लयलाई कायम राखेपछि अमेरिकी मेजर लिग सकर (एमएलएस) क्लब इन्टर मियामीले लिग्स कपमा ओर्लान्डो सिटीविरुद्ध ३–१ को जित निकालेको छ । मेसीले लगातार तीन खेलमा गोल गर्दा मियामीले तीनै खेल जितेको हो ।

बिहीबार मियामीको जितमा मेसीले दुई र जोसेफ मार्टिनेजले एक गोल गरे । ओर्लान्डोका सेर अराउहोले एक गोल फर्काएका थिए ।

खेलको सातौैँ मिनेटमा मेसीले गरेको गोलबाट मियामीले अग्रता बनाएको थियो । १७औँ मिनेटमा अराउहोले गरेको गोलबाट ओर्लान्डो खेलमा फर्किएको थियो ।

५१औँ मिनेटमा मार्टिनेजले पेनाल्टीमार्फत गोल गर्दै मियामीलाई पुनः अग्रता दिलाएका थिए । ७२औँ मिनेटमा मेसीले व्यक्तिगत दोस्रो गोल गर्दै मियामीलाई ३–१ को अग्रता दिलाए । यसपछि दुवै टिमबाट थप गोल भएन ।

ओर्लान्डोविरुद्ध बार्सिलोनाका पूर्वरक्षक जोर्डी अल्बाले मियामीबाट ‘डेब्यु’ गरेका थिए । मियामीले अब अन्तिम–१६ मा एफसी डल्लासविरुद्ध खेल्नेछ ।

मेसीले इन्टर मियामीबाट तीन खेल खेल्दा पाँच गोल गरिसकेका छन् । उनले मियामीबाट डेब्युमै एक र दोस्रो खेलमा दुई गोल गरेका थिए ।