काठमाडौं । विवेकशील साझा पार्टीले प्रकाशन गरेको ‘ऐतिहासिक नेपालको गौरवमय सांस्कृतिक मानचित्र’ उपराष्ट्रपति रामसहायप्रसाद यादवलाई हस्तान्तरण गरेको छ ।
पार्टी प्रवक्ता आशुतोष प्रधानले दिएको जानकारीअनुसार मंगलबार उपराष्ट्रपति यादवलाई उनको कार्यकक्षमा भेटेर प्रकाशन हस्तानान्तरण गरिएको हो ।
“विवेकशील साझा पार्टीले सरकारले निर्वाह गर्नु पर्ने दायित्व स्मरण गराउँदै नेपालको सांस्कृतिक मानचित्र सार्वजनिक गरेर सरोकारवालाहरुलाई स्मरण गराउने अभियानबमोजिम यो अभियान थालेको हो,” प्रवक्ता प्रधानले भने ।
पुस्तकमा पार्टीले नेपालको सुगौली सन्धिअगाडिको भू–भाग र वर्तमान भू–भागमा रहेका सांस्कृतिक, धार्मिक, पुरातात्विक र प्राकृतिक धरोहरहरुलाई समेटेर निर्माण गरिएको मानचित्रमा सगरमाथादेखि वौद्ध स्तुपासम्म, पशुपतिनाथदेखि काँक्रेविहारसम्मका पुरातात्विक महत्वका सम्पदा समेटिएको जानकारी दिए ।
साथै, उनले मानसरोवरदेखि गंगा मैदानसम्मका धरोहरलाई नक्सांकन गरिएको र धरातलीय यथार्थमा नेपालको वर्तमान राजनीतिक नक्साभित्र रहेका सांस्कृतिक, पुरातात्विक सम्पदालाई झल्काइएको बताए ।
