काठमाडौं । सत्तारूढ प्रमुख घटक नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले नेपाली कांग्रेसले प्रधानमन्त्री बन्न गरेको प्रस्ताव अस्वीकार गरेपछि उपप्रधान एवं गृहमन्त्री रवि लामिछानेमाथि सहकारी ठगीको आरोप लगाइएको बताएका छन् । पार्टीको काठमाडौं महानगरपालिका कमिटीले शनिबार आयोजना गरेको एक कार्यक्रममा उनले यस्तो बताएका हुन् ।

“...रातिसम्म त्यो मान्छे कांग्रेसको पछि लाग्ने हो भने प्रधानमन्त्री बन्न लायक भयो,” उनले भने, “कांग्रेसको पछि लागेर प्रधानमन्त्री हुन्नँ भन्यो भने त्यो मान्छे भ्रष्टाचारी भयो । के भएको हो कांग्रेस ?”

सहकारीको रकम हिनामिनाको आरोप लगाइए पनि त्यसको खण्डन संसद्‌मा गर्न उपप्रधानमन्त्री लामिछानेलाई नदिएको उनले उल्लेख गरे । उनले कांग्रेसले सत्तास्वार्थका निम्ति उपप्रधानमन्त्री लामिछानेले सहकारीको बचत अपचलन गरेको भन्दै हिँडेको आरोप पनि लगाए ।

“संसद् चल्न दिन्न भन्छ, किन ? आफू बोल्छ, अरूलाई आरोप लगाउँछ । आरोपित मान्छेले जवाफ दिन्छु भन्दा जवाफ दिन दिँदैन, बोल्न दिँदैन,” उनले भने, “आरोप लगाउने, संसद्‌मा आरोप लगाउने, खण्डन गर्छु म, बोल्छु म भन्दा अर्कोलाई बोल्न नदिने ।”

कांग्रेस लोकतान्त्रिक शक्ति नभएको भन्दै उनले उसले सत्तास्वार्थका निम्ति जे पनि गर्न थालेको टिप्पणी गरे । त्यसलाई सच्याउन एमाले मुलुकको निर्णायक राष्ट्रिय शक्ति बन्नुको विकल्प नभएको उनको भनाइ थियो । न्युज एजेन्सी नेपाल