काठमाडौं । धादिङका ३९ वर्षीय सविन तामाङ (नाम परिवर्तन) को न्युरोडमा फेन्सी कपडा पसल छ । 

७/८ वर्षदेखि फेन्सी पसल सञ्चालन गर्दै आएका सविनको कमाइ ठिकै थियो । उनको छेउमै सिन्धुपाल्चोकका एक जना अर्का साथीले पनि फेन्सी पसल नै चलाएका थिए ।

पसलसँगै भएका कारण उनीहरुको दिनहुँ भेट हुने नै भयो ।  त्यही भेटमा उनीहरुले नेपाल बसेर राम्रो प्रगति गर्न नसकेको निराशाका कुरा पनि एक अर्कालाई सेयर गर्न थाले ।  बरु राम्रो देश जान पाए पैसा खर्च गरेर भए पनि बाहिर जान पाए हुन्थ्यो भन्ने मनिस्थितिमा सविन पुगि सकेका थिए ।

कुरा चल्दै गर्दा सिन्धुपाल्चोकका साथीले सविनलाई २०७९ फागुनमा अमेरिका पठाउने एजेन्ट आफूले चिनेको र जाने भए भेटाइदिने प्रस्ताव ल्याए ।  नेपाल कहिले छोडौं भन्ने मनिस्थितिमा पुगेका सविनले हुन्छ भेटौँ भनिहाले । आफ्नै छेउको पसलको साथीले नराम्रो मानिसलाई भेटाउला भन्ने शंका उनमा थिएन ।

अझ अमेरिका पठाउने एजेन्टले आफ्नो छोरीलाई समेत अमेरिका पठाइसकेको जानकारी सविनलाई सुनाए ।  साथीको कुरा सुनेका सविन आफू पनि अमेरिका पुग्ने सपना देखि सकेका थिए ।

सविन अमेरिका पठाउने एजेन्ट भेट्न बौद्धस्थित ङिमबुटी शेर्पाको चिया पसल पुगे ।  सिन्धुपाल्चोक भोटेकोशी गाउँपालिका–२ का ४७ वर्षीय टासी शेर्पासमेत त्यहीँ थिए । अमेरिका पठाउने मूख्य एजेन्ट नै टासी हुन् ।

टासीसँगको भेटपछि सविन अझ ढुक्कले अमेरिका पुग्ने पसना देखेर पसल फर्किए । टासीसँगको भेटपछि भने न्युरोडमा भएको कपडा पसल बिक्री गरे । बिक्रीबाट आएको रकम र केही क्रण गरेर उनी अमेरिका जाने तयारीमा लागे ।

त्यसका लागि उनले ३० लाख रुपैयाँ जम्मा गरे । भिसा प्रक्रिया र कागजातका लागि सुरुमा टासीलाई पाँच लाख रुपैयाँ बुझाए ।  सविनजस्तै अन्य १५ जना त्यसैगरी अमेरिका पुग्न टासीलाई भेट्न बौद्धस्थित ङिमवुटी शेर्पाको चिया पसल धाइरहेका थिए ।

सविनले पाँच लाख बुझाएको तीनदिन पछि नै भिसा प्रक्रिया अघि बढेको भन्दै ७ लाख रुपैयाँ बराबरको डलर साट्न लगाए ।  डलर साटेको चार दिनपछि नै सविन सहितका १५ जना युवा अमेरिकाका लागि दुवई ट्रान्जिट पारेर युगान्डा हानिए २०७९ चैत ३० मा ।  

जब युगान्डा हुँदै केन्या पुगे...

अमेरिका पुर्‍याउने र फुड प्याकिङको काम लगाउने भन्दै प्रतिव्यक्ति ५० लाख उठाएका थिए टासीले । मासिक तलब ४ लाख हुने टासीले नेपालमै तोकिदिएका थिए । दुवई हुँदै युगान्डा पुगेका सविन सहितका युवाहरुलाई अफ्रिकी मुलका एजेन्टले विमानस्थलबाट रिसिभ गरेर होटलमा पुर्‍याए । 

पासपोर्ट र पाँच लाख बराबर साटेको डलर एजेन्टलाई बुझाए । भिसा प्रक्रिया हुँदै छ भन्दा भन्दै तीन महिनासम्म युगाण्डाको होटलमा उनीहरु बन्धक बनाएर राखिए । तीन महिना पछि भने उनीहरुले युगान्डाबाट केन्या हुँदै ब्राजिल र अमेरिका पुगिने भन्दै नैरोबी पुर्‍याए । युगान्डाको जस्तै त्यहाँ पनि उनीहरुलाई रिसिभ गर्न अफ्रिकी मूलका एजेन्ट नै पुगेका थिए ।

एजेन्टहरुले उनीहरुलाई एउटा भाडाको घरमा राखे । त्यही घरमा उनीहरु ६ महिना बसे । केन्याको एजेन्टलाई पनि उनीहरुले युगान्डामा जस्तै रकम र पासपोर्ट दिए । केन्याबाट ब्राजिल पुर्‍याउने उनीहरुले बताएका थिए ।
तर, ६ महिना एउटै घरमा राखेका केन्याका एजेन्टले ६ महिना पछि फेरि अर्को ठाउँमा राखे । अर्को ठाउँमा समेत ३ महिना राखेपछि प्रहरीले पक्राउ गर्न सक्ने भन्दै पासपोर्ट फिर्ता दिए ।

युगान्डा हुँदै केन्या पुगेका सविन सहित १५ जना युवाहरुले प्रतिव्यक्ति ५० लाख रुपैयाँसम्म विभिन्न एजेन्टहरुलाई रकम बुझाए पछि नेपाल फर्किएका हुन् । उनीहरु पाँच करोड भन्दा बढी रकम बुझाएर नेपाल फर्किएका हुन् । 

१५ जनामध्ये १० जनाले प्रहरीमा उजुरी दिएपछि नेपालबाट अमेरिका पठाउने एजेन्टहरु मध्येका तीन जना पक्राउ परेका छन् । उपत्यका अपराध अनुसन्धान कार्यालयका डीसएसपी गोविन्द पन्थी नेतृत्वको टोलीले बौद्धबाट टासी शेर्पा, ङिमबुटी शेर्पा र निमा शेर्पालाई पक्राउ गरेको हो ।

पक्राउ परेकाहरुमाथि थप अनुसन्धान जारी रहेको कार्यालयका एसपी रविन्द्र रेग्मीले जानकारी दिए ।  टासी सहितको समूहले थप अन्यलाई समेत अमेरिका पठाउने भन्दै ठूलो रकम लिएर अफ्रिकी मूलुकमा बन्धक बनाएको आंशका प्रहरीले गरेको छ ।