काठमाडौं । नेपाली कांग्रेसका नेता शेखर कोइरालाले आफूलाई केन्द्रीय समिति बैठक लाइभ गरेकोप्रति असन्तुष्टि जनाएका छन् । ४१औँ बीपी स्मृति सप्ताहको अवसरमा मंगलबार काठमाडौंमा आयोजित कार्यक्रममा उनले केन्द्रीय समितिमा राखिने कतिपय विषय बाहिर आउन नहुने धारणा राखे ।

"पहिलोपटक बैठक लाइभ गर्‍यौँ । कतिलाई राम्रो लाग्यो, कतिलाई नराम्रो । मलाई चाहिँ असजिलो लाग्यो । केन्द्रीय समिति भनेपछि कतिपय कुरा बाहिर आउनुभएन । यो बैठकमा धेरै समय हामीले आरोपप्रत्यारोपमै खर्च गर्‍यौँ," उनले भने ।

उनले केन्द्रीय समिति बैठकपछि कांग्रेसलाई विधिसम्मत चलाउने विश्वास दिलाए । "हाम्रो एउटै चाहना नेपाली कांग्रेस विधि, विधानअनुसार चलोस् भन्ने हो । त्यो चाहना पूरा भएको छैन । धेरै प्रयास गर्दा हामीले सकेनौँ । भ्रातृ संस्थाहरू, शुभेच्छुक संस्थाहरू, विभाग बनाउन सकेको छैन । अनुशासन समिति पूर्ण भएको छैन । अब कांग्रेस विधि र विधानसम्मत चलाउने विश्वास दिलाउन चाहन्छु," कोइरालाले भने । 

उनले निर्वाचन प्रणालीमा विचार गर्नुपर्ने तर्क गरे । अहिलेको निर्वाचन प्रणालीबाट एक दलको बहुमत आउने अवस्था नरहेकाले कांग्रेस नेतृत्व निर्वाचन प्रणाली फेर्न नेतृत्व गर्नुपर्ने कोइरालाको भनाइ छ । 

"निर्वाचन प्रणाली सम्भव नहुने बनायौँ, बहुमत नआउने अवस्था छ । समावेशी सहभागिता र समानुपातिक चरित्रको प्रत्यक्ष निर्वाचन गर्नुपर्छ । प्रत्यक्ष निर्वाचनमार्फत समावेशी, समानुपातिक बनाउन सकिन्छ । त्यो इच्छा शक्ति कांग्रेसले देखाएर अरू दललाई कन्भिन्स गर्नुपर्छ," उनले भने ।

उनले आगामी दिनमा कांग्रेस एक्लै निर्वाचनमा जानुपर्ने पनि बताए । उनले पार्टीबाट धेरै उमेदवार नउठाएकाले समानुपातिक मत घटेको तर्क गरे । 

"साढे सात प्रतिशत समानुपातिक मत घट्यो । किनभने हाम्रो उमेदवार धेरै ठाउँमा थिएनन् । टिकट वितरणमा न्याय दिन हामीले सकेनौँ । संसदीय बोर्डमा भएकाले म क्षमा माग्न चाहन्छु," उनले ने । 

उनले भ्रष्टाचारले देशलाई गम्भीर तरिकाले गाजेकाले आगामी दिनमा कांग्रेस शून्य सहनशीलतामा अघि बढ्नुपर्ने बताए । मूल्यवृद्धिले  जनतालाई कठिन भएकोतर्फ दलहरू सचेत बन्न नसकेको उनको आरोप छ । 

"रोजगारी छँदै छैन भने हुन्छ । प्रत्यक वर्ष ६ लाख मानिस श्रम बजारमा आउँछन् । तर, ५० हजारलाई रोजगारी दिन सकिन्न । कसरी देश बन्छ ?," उनको प्रश्न थियो ।

उनले अगाडि थपे,"किसानको कुरा गर्दा मलखातको कुरै नर्दा हुन्छ । छिमेकी मुलुकले चामल विश्वभर नपठाउने भन्यो, अब हालत के होला ? यस्तो विषयमा कांग्रेसले गम्भीर रूपमा सोच्नुपर्छ," उनले भने । 

उनले बीपीको पार्टी जनताबाट टाढिएको बताउँदै जनतासँग गए फेरि पार्टीलाई बलियो बनाउन सकिने बताए ।

"तपाईंलाई कुनै किसिमको अन्याय नहुने प्रतिबद्धता जनाउँछु । विनम्र अनुरोध छ, जनतासँग जोडिनुहोस् । बीपीको पार्टी जनताबाट टाढिएको छ । जनता सँग गए बीपीको पार्टी बनाउन सकिन्छ, त्यो अठोटको साथ अघि बढौँ," उनले भने ।