काठमाडौं । नेपालको वैदेशिक व्यापार घाटा १५.१५ प्रतिशतले घटेको छ ।

भन्सार विभागले सोमबार सार्वजनिक गरेको तथ्यांकानुसार गएको आर्थिक वर्ष २०७९/८० मा नेपालले विभिन्न देशबाट १६ खर्ब ११ अर्ब ७३ करोड १७ लाख ७० हजार रुपैयाँको वस्तु आयात गरेको थियो ।

सोही अवधिमा नेपालले मात्र एक खर्ब ५७ अर्ब १४ करोड ६ लाख ९५ हजार रुपैयाँको वस्तु निर्यात गरेको थियो ।

पछिल्लो एक वर्षमा नेपालको वैदेशिक व्यापार घाटा १४ खर्ब ५४ अर्ब ५९ करोड १० लाख ७४ हजार रुपैयाँ छ ।

विभागका अनुसार उक्त अवधिमा नेपालको आयात १६.०८ प्रतिशतले घटेको छ । निर्यात २१.४४ प्रतिशतले घटेको छ । वैदेशिक व्यापार घाटा १५.४५ प्रतिशतले घटेको विभागले जनाएको छ ।

अघिल्लो आर्थिक वर्ष २०७८/७९ मा नेपालले १९ खर्ब २० अर्ब ४४ करोड ८३ लाख ४९ हजार रुपैयाँको वस्तु आयात र दुई खर्ब तीन करोड नौ लाख ६२ हजार रुपैयाँको वस्तु निर्यात गरेको थियो ।

आर्थिक वर्ष २०७९/८० मा नेपालको कुल वैदेशिक व्यापार १७ खर्ब ६८ अर्ब ८७ करोड २४ लाख ६५ हजार रुपैयाँको रहेको विभागले जनाएको छ ।

अघिल्लो आर्थिक वर्ष नेपालको कुल वैदेशिक व्यापार २१ खर्ब २० अर्ब ४७ करोड ९३ लाख ११ हजार रुपैयाँको थियो । अघिल्लो वर्षको तुलनामा गएको वर्ष वैदेशिक व्यापार १६.५८ प्रतिशतले घटेको छ ।