विराटनगर । विराटनगर महानगरपालिकाले संस्थागत विद्यालयहरुलाई छात्रवृत्तिको विवरण पेस गर्न २४ घण्टे अल्टिमेटम दिएको छ । महानगरको संस्थागत छात्रवृत्ति व्यवस्थापन समितिको आइतबार बसेको बैठकले छात्रवृत्तिको विवरण पेस गर्न विद्यालयहरुलाई समयसीमा दिएको हो । नियमानुसार नगर्ने विद्यालयलाई कारबाही अघि बढाइने महानगरको शिक्षा महाशाखाले जनाएको छ ।

महानगरका मेयर नागेश कोइरालाको अध्यक्षतामा बसेको बैठकले शैक्षिक सत्र २०७९ को बालविकास कक्षादेखि कक्षा १२ सम्म र शैक्षिक सत्र २०८० को बालविकासदेखि कक्षा १० सम्म अध्ययन गर्ने विद्यार्थीहरुका लागि उपलब्ध गराएको छात्रवृत्ति वितरणको विवरण हालसम्म पेस नगर्ने विद्यालयमाथि कारबाही अगाडि बढाउने निर्णय गरेको छ । विवरण पेस नगर्ने विद्यालयको नाम महानगरको वेबसाइटमार्फत सार्वजनिकसमेत गरेको छ ।

“सोमबार ५ बजेसम्म छात्रवृत्तिको सम्पूर्ण विवरण पेस नगरे हामी त्यस्ता विद्यालयमाथि कारबाही प्रक्रिया अगाडि बढाउँछौँ,” मेयर कोइरालाले भने, “महानगरले पटकपटक विवरण उपलब्ध गराउनका लागि ताकेता गर्दा पनि बेवास्ता गरेको पाइएको छ । अब भोलि सोमबारसम्म हेरौँ, त्यसपछि महानगर कडा रुपमा प्रस्तुत हुन्छ ।”

एकीकृत शैक्षिक सूचना व्यवस्थापन प्रणाली (आईईएमआईएस) अनुसार विराटनगर महानगरपालिका क्षेत्रभित्र संस्थागत विद्यालयको संख्या ८९ रहेको छ  । त्यस्तै, आईईएमआईएसमा दर्ता नभएका विद्यालयको संख्यासमेत जोड्ने हो भने महानगरभित्र करिब १०० को हाराहारीमा संस्थागत विद्यालयहरु सञ्चालनमा रहेका छन् ।

त्यसमध्ये आइतबार कार्यालय समयभित्र ६५ वटा विद्यालयले शैक्षिक सत्र २०७९ को छात्रवृत्ति वितरणको विवरण पेस गरेका छन् । सोही शैक्षिक सत्रमा २७ वटा विद्यालयले अझै विवरण पेस गरेका छैनन् ।

त्यस्तै, २०८० का लागि ५५ वटा विद्यालयले विवरण पेस गरेका शैक्षिक प्रशासन महाशाखाका अधिकृत रमेश खड्काले जानकारी दिए । खड्काका अनुसार २०८० का लागि ३७ वटा विद्यालयले विवरण पेस गर्न बाँकी छ ।

यसैगरी शैक्षिक सत्र २०८० मा कक्षा ११ को छात्रवृत्ति व्यवस्थापनसम्बन्धी परीक्षा महानगर आफैले लिने तयारी गरेको छ ।