काठमाडौं । इटालीको भ्रमणमा रहेका प्रधानमन्त्री पुष्पकमल दाहाल प्रचण्डले संयुक्त राष्ट्रसंघका महासचिव एन्टोनियो गुटेर्रेस र बंगलादेशकी प्रधानमन्त्री शेख हसिनासँग द्विपक्षीय वार्ता गर्ने भएका छन् । दुवै भेटवार्ता इटालीको राजधानी रोममा हुने भियनास्थित नेपाली दूतावासले जनाएको छ ।

प्रधानमन्त्री दाहाल संयुक्त राष्ट्रसंघ, इटाली सरकार र संयुक्त राष्ट्रसंघको रोममा रहेको खाद्य तथा कृषि संगठनले आयोजना गर्ने खाद्य प्रणालीसम्बन्धी कार्यक्रममा सहभागी हुन शनिबार त्यसतर्फ गएका हुन् ।

स्थानीय समयअनुसार आइतबार बिहान ७ः३० बजे इटालीको रोम पुगेका प्रधानमन्त्री दाहालले राष्ट्रसंघको कार्यक्रमको साइडलाइनमा सोमबार बंगलादेशकी प्रधानमन्त्री र राष्ट्रसंघका महासचिवसँग छुटुटछुट्टै भेटवार्ता गर्न लागेका हुन् ।

उनले सोमबार पहिला बंगलादेशकी प्रधानमन्त्री शेख हसिनासँग द्विपक्षीय भेटवार्ता गर्नेछन् । त्यसपछि संयुक्त राष्ट्रसंघका महासचिव एन्टोनियो गुटेर्रेससँग उनको भेट हुनेछ ।

प्रधानमन्त्री दाहाल इटालीमा रहँदा खाद्य तथा कृषि सङ्गठन (एफएओ)का महानिर्देशक, विश्व खाद्य कार्यक्रम (डब्लूएफपी)का कार्यकारी निर्देशक र कृषि विकासका लागि अन्तर्राष्ट्रिय कोष (एडीआईएफ) कार्यक्रमका अध्यक्षले पनि छुट्टाछुट्टै भेट गर्ने कार्यक्रम रहेको छ ।