काठमाडौं । कम्बोडियामा आइतबार भइरहेको आम चुनावमा लामो समयदेखि शक्तिमा रहेका प्रधानमन्त्री हुन सेनकै पार्टीले एकतर्फी जित हात पार्ने निश्चित भएको बीबीसीले जनाएको छ ।

कम्बोडियाको राजधानी नोम पेन्हमा मतदान गर्न आएका मतदाताले प्रधानमन्त्री हुन सेनको पार्टी कम्बोडियन पिपुल्स पार्टी (सीपीपी) ले संसद्का सबै १२५ सिट जित्ने अपेक्षा गरिएको बताएका छन् ।

विगत ३८ वर्षदेखि सत्तामा रहेका हुन सेनले गत मे महिनामा एकमात्र बलियो प्रतिपक्षी दललाई चुनाव लड्न अयोग्य घोषित गरेपछि अहिले उनलाई कुनै चुनौती नभएको बताइएको छ ।

सेनाका आलोचक एवं विरोधीले चुनाव र मतदानलाई धोका एवं जालझेल भनेका छन् । ७० वर्षीय सेन सन् १९८५ देखि शक्तिमा रहेको सीएनएनले उल्लेख गरेको छ ।

करिब एक करोड ६० लाख जनसंख्या रहेको कम्बोडियाका करिब ९७ लाख मानिसले बिहान ७ बजेदेखि मतदान गरिरहेको जनाइएको छ । कम्बोडियन पिपुल्स पार्टीसँगै अन्य १७ पार्टी पनि चुनावी मैदानमा रहे पनि सेनकै पार्टीले सबै सिट जित्ने ठानिएको छ । यसलाई सत्तामा उनको निरन्तरताको सुनिश्चिताका रूपमा हेरिएको छ ।