काठमाडौं । नारी साहित्यकारहरूको संस्था गुञ्जनले स्थापनाको रजत जयन्तीका अवसरमा विभिन्न विधाका स्रष्टाहरूलाई पुरस्कृत तथा सम्मानित गरेको छ ।
शुक्रबार काठमाडौंमा गुञ्जनद्वारा आयोजित कार्यक्रमका प्रमुख अतिथि प्रा.डा. अभि सुवेदीले ‘गुञ्जन प्रतिभा पुरस्कार २०७९’ कवि गीता कार्कीलाई प्रदान गरे । त्यस्तै, ‘गुञ्जन त्रिवेणी आख्यान पुरस्कार’ पहिलो पटक साहित्यकार भुवन ढुङ्गानालाई प्रदान गरे । त्रिवेणी आख्यान पुरस्कार आख्यानकारहरू पद्मावती सिंह, माया ठकुरी र भागीरथी श्रेष्ठले स्थापना गरेका हुन् ।
सोअवसरमा सुवेदीले ‘गुञ्जन मातृभाषा पुरस्कार’ राधिका लिम्बुलाई, ‘गुञ्जन साहित्य पुरस्कार’ कवि विश्वविमोहन श्रेष्ठलाई, ‘गुञ्जन जेष्ठ नागरिक सम्मान’ रेवती राजभण्डारीलाई तथा ‘गुञ्जन रजत जयन्ती सम्मान’ लक्ष्मी राजभण्डारीलाई प्रदान गरे ।
कार्यक्रममा गुञ्जनले पाल्पाका सर्जकहरू राजेन्द्रगोपाल सिंह र पुष्कर अथक रेग्मीलाई विशेष सम्मान प्रदान गरियो ।
सोअवसरमा प्रा.डा. सुवेदी, गुञ्जनकी अध्यक्ष जलेश्वरी श्रेष्ठ, साहित्यकार भागीरथी श्रेष्ठ, इल्या भट्टराई, डा. रजनी ढकाललगायतले बोलेका थिए ।
