काठमाडौं ।  भैरहवास्थित गौतमबुद्ध अन्तर्राष्ट्रिय विमानस्थलबाट उडान गर्न जजिरा एयरवेजले नेपाल नागरिक उड्डयन प्राधिकरणलाई पत्र पठाएको छ । 

आगामी अक्टोबरबाट साताको तीन दिन उडान गर्न जजिराले पत्र पठाएको हो । अनुमतिका लागि केही प्रक्रिया बाँकी रहेको प्राधिकरणका प्रवक्ता ज्ञानेन्द्र भुलले बताए । 

विमानस्थल सञ्चालनमा आएदेखि उडान गर्दै आएको जजिराले पछिल्लो पटक गत अप्रिल १९ बाट उडान बन्द गरेको थियो । 

त्यतिबेला कम्पनीले मे ८ देखि नियमित उडान गर्ने भन्दै उडान बन्द गरेको थियो । तर, अहिलेसम्म उडान सुरु गरेको छैन । उडान के कारण सुरु नगरिएको हो भन्ने जानकारी भने दिएको छैन ।  

यसअघि व्यापारिक कारण उडान बन्द गरेको जजिराले उल्लेख गरेको थियो । जजिराले जारी गरेको अर्काे सूचनामा उडानको बारेमा जानकारी दिने जनाए पनि अहिलेसम्म कुनै पनि सूचना नपठाएको विमानस्थलका प्रवक्ता विनोदसिंह रावलले जानकारी दिए ।

यसअघि पनि विभिन्न कारण देखाउँदै केही महिना जजिराले उडान बन्द गरेको थियो । हाल उक्त विमानस्थलबाट नेपाल एयरलाइन्सले मात्र अन्तर्राष्ट्रिय उडान भर्दै आएको छ ।