काठमाडौं । नेपाली कांग्रेस केन्द्रीय सदस्य आरजु राणाले राजनीति सधैँ चुनौतीबाटै अघि बढ्ने बताएकी छन् । कांग्रेस चुनौतीमा रहेको भनेर चिन्ता गर्नेहरूलाई जवाफ दिँदै उनले द्वापर युगदेखि राजनीतिमा चुनौती नै रहेको भन्दै कलियुगमा राजनीति थप चुनौतीपूर्ण रहेको बताइन् ।
“राजनीति भनेकै असहज स्थिति हो । द्वापर युगदेखि कहिले पनि राजनीति सहज छैन,” राणाले भनिन्, “अहिले कलियुगमा पनि राजनीति गर्न असहज हुन्छ भनेर डराएर बस्नेहरू मैदान छोडेर जानुपर्यो ।” उनले राजनीति गर्छु भनेर आएकाहरूले मुद्दामा सहमत/असहमत जे भए पनि पार्टीको सिद्धान्त बोकेर अघि बढ्नुपर्ने बताइन् ।
“सहमत/असहमत जे भए पनि अघि बढ्नुपर्यो । पार्टीको प्रिन्सिपलको पछाडि लाग्नुपर्यो । अनि मात्रै राजनीति हुन्छ,” आरजुले भनिन् ।
जिल्ला सभापतिदेखि महामन्त्रीसम्मले पार्टीका विषयमा असन्तुष्टि बढ्दै जाँदा नयाँ शक्तिहरूका पछाडि लहर देखिएको र कांग्रेसमाथि चुनौती बढेको बताएका थिए । उनीहरूले नेतृत्वको कार्यशैलीमा सुधार नभए कांग्रेस थप संकटमा पर्ने चेतावनी समेत दिएका थिए ।
केन्द्रीय समिति बैठकमा समेत कतिपय केन्द्रीय सदस्यले पार्टी नेतृत्वका कारण कार्यकर्तामा देखिएको असन्तुष्टिको लाभ अन्य शक्तिले लिइरहेको बताएका थिए । त्यसको जवाफमा आर्जुले चुनौतीपूर्ण भयो भनेर डराउनेलाई मैदान छोडेर जान सुझाव दिएकी हुन् ।