काठमाडौं । अमेरिकामा गरिएको परिक्षणमा आमो अथवा स्तन दूधमा २५ प्रकारका विषाक्त रसायन फेला पारेको एक अध्ययनले देखाएको छ । 

अमेरिकामा भएको यो अध्ययनका लागि ५० भन्दाबढी आमाको दूधको नमुना परिक्षण गरिएको थियो ।

यी सबै दूधको नमुनामा ब्रोमिनेटेड फ्लेम रिटारडेन्ट अथवा आगो विरोधी पदार्थ फेला परेको अध्ययनले देखाएको हो ।

सामान्यतया ब्रोमिनेटेड फ्लेम रिटारडेन्ट आगलागी हुनबाट जोगाउनका लागि प्लास्टिक, टेलिभिजन र इलेक्ट्रोनिक उपकरणमा प्रयोग गरिन्छ ।

नियमन नगरिएको तल्लो स्तरको फ्लेम रिटार्डेन्ट्स ब्रोमोफेनोल पनि पहिलो पटक स्तनको दूधमा फेला परेको अध्ययनले देखाएको छ ।

यी विषाक्त पदार्थ बालबालिकाहरूका लगि न्युरोटक्सिक भएको अध्ययनकी सहलेखिका एवं टक्सिक फ्रि फ्युचरकी विषाक्त विशेषज्ञ एरिका श्रेडरको भनाइ छ ।

उपभोक्ता उत्पादन र इलेक्ट्रोनिक्समा आगो रोक्न प्रयोग गरिने ७५ रसायनमध्येको एक समूह ब्रोमिनेटेड फ्लेम रिटार्डेन्टहरू हो ।

यस्ता पुराना रसायनहरू सन् १९७० को दशकमा प्रतिबन्ध गरिएको थियो । तर, अहिले नयाँ किसिमका रसायन प्रयोग हुँदै आएका छन् ।

प्लास्टिकबाट रसायन टुक्रिएर धुलो भएपछि सासबाट वा निलिएर मानिस ब्रोमिनेटेड फ्लेम रिटार्डेन्टको सम्पर्कमा आउँछन् । अनुसन्धानकर्ताहरूले यसको प्रयोग न्यूनीकरण एवं नियमनका लागि आवाज उठाएका छन् ।