मोरङ । कोसी प्रदेशमा विगत वर्षको तुलनामा आर्थिक वर्ष २०७९/८० मा सवारीसाधन दुर्घटनामा कमी आएको छ । सवारीसाधन दुर्घटनाबाट हुने मानवीय क्षति पनि कम भएको छ ।

नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका प्रवक्ता मोहनविक्रम दाहालका अनुसार आव २०७९/८० मा तीन हजार ५१० सवारीसाधन दुर्घटना हुँदा ४१२ जनाको मृत्यु भएको थियो । दुर्घटनामा परी ८१० जना गम्भीर तथा चार हजार ७९७ जना सामान्य घाइते भएका थिए ।

आव २०७८/७९ मा प्रदेशमा तीन हजार ८२० सवारीसाधन दुर्घटनामा परेका थिए । दुर्घटनाबाट ५३१ जनाको मृत्यु, एक हजार २०३ जना गम्भीर घाइते र पाँच हजार ४४५ जना सामान्य घाइते भएका दाहालले बताए । ट्राफिक सचेतना कार्यक्रम र प्रहरी कारबाहीको प्रभावकारिताका कारण सवारी दुर्घटना तथा मानवीय क्षति कम भएको उनको भनाइ छ । 

आव २०७९/८० मा अघिल्लो आवको तुलनामा सवारीसाधन दुर्घटना आठ प्रतिशत कम, मानवीय क्षति २२ प्रतिशत कम, गम्भीर घाइते ३३ प्रतिशत कम तथा सामान्य घाइते १२ प्रतिशत कम भएको तथ्यांक छ । आव २०७९/८० मा उक्त अवधिमा आठ हजार ३६३ जनालाई मादक पदार्थ सेवन कारबाही, २६ हजार ६६४ जनालाई सवारी शिक्षा र तीन लाख एक हजार ८७१ जनालाई सवारी नियम उल्लंघन गरेकामा  जरिबाना गरिएको प्रवक्ता दाहालले जानकारी दिए । 

आव २०७८/७९ मा पाँच हजार १०५ जनालाई मापसे कारबाही, १९ हजार ८३३ जनालाई सवारी शिक्षा र दुई लाख ६९ हजार ८२३ जनलाई सवारी नियम उल्लंघन गरेकामा जरिबाना गरिएको थियो ।

सवारी नियम उल्लंघन गर्नेलाई जरिबाना गर्दा राजस्व संकलनमा समेत वृद्धि भएको छ । आव २०७९/८० मा रु २० करोड सात लाख ३५ हजार राजस्व संकलन भएको छ भने  आव २०७८/७९ मा रु १८ करोड एक लाख ५९ हजार राजस्व संकलन भएको थियो । रासस