काठमाडौं । पाकिस्तान ‘ए’ विरुद्ध आठ विकेटको सहज जित निकाल्दै भारत ‘ए’ एसीसी मेन्स इमर्जिङ टिम्स एसिया कपको समूह ‘बी’ को विजेता बनेको छ ।

बुधबार श्रीलंकाको आर प्रेमादासा रंगशालामा सम्पन्न खेलमा पाकिस्तानले प्रस्तुत गरेको २०६ रनको लक्ष्य भारतले ३६.४ ओभरमा दुई विकेट गुमाएर पूरा गर्‍यो ।

भारतको जितमा ओपनर साई सुदर्शनले अविजित १०४ रन बनाए । उनले ११० बलमा १० चौका र तीन छक्का प्रहार गरे । निकिम जोसले ५३ रन जोडे । कप्तान यस धुल २१ रनमा अविजित रहँदा अभिषेक शर्माले २० रन थपे ।

पाकिस्तानका मुबासिर खान र मेह्रान मुम्ताजले समान एक विकेट लिए ।

त्यसअघि टस जितेर ब्याटिङमा आएको पाकिस्तानले ४८ ओभरमा सबै विकेट गुमाएर २०५ रनको योगफल खडा गरेको थियो ।

पाकिस्तानका कसिम अक्रमले ४८ रन बनाए । साहिबजादा फर्हानले ३५, मुबासिर खानले २८, हसिबुल्लाह खानले २७ र मेह्रान मुम्ताजले २५ रन जोडे । कमरान गुलामले १५ र कप्तान मोहम्मद ह्यारिसले १४ रन थपे ।

भारतका राजवन्र्धन हंगारगेकरले पाँच विकेट लिए । हंगारगेकरदृ आठ ओभर बलिङ गर्दा एक मेडन राख्दै ४२ रन खर्चिए । मानव सुथरले तीन विकेट लिए । रियान पराग र निशान्त सिन्धुले समान एक–एक विकेट लिए ।

जितसँगै तीन खेलबाट ६ अंक जोडेको भारत समूह ‘बी’ को विजेता बन्दै सेमिफाइन प्रवेश गरेको छ । हारका बावजुद पाकिस्तान पनि समूह उपविजेताको रुपमा सेमिफाइनल प्रवेश गरेको छ । यो समूहमा रहेका नेपाल र युनाइटेड अरब इमिरेट्स (यूएई) भने प्रतियोगिताबाट बाहिरिएका छन् ।

भारतले अब सेमिफाइनलमा समूह ‘ए’ को उपविजेता बंगलादेश ‘ए’ विरुद्ध प्रतिस्पर्धा गर्नेछ । यस्तै, पाकिस्तानले समूह ‘ए’ को विजेता श्रीलंकाविरुद्ध खेल्नेछ ।