काठमाडौं । इजरायली महिला लिग (लिगाट नासिम) का लागि इजरायल जाने नेपाली राष्ट्रिय महिला फुटबल टिमकी फरवार्ड सावित्रा भण्डारीलाई बुधबार बिदाइ गरिएको छ । 

लिगाट नासिमको नयाँ सिजनक लागि अगस्ट १ मा इजरालय प्रस्थान गर्ने सावित्राका लागि युवा तथा खेलकुद मन्त्रालयले बिदाइ कार्यक्रम आयोजना गरेको हो । सावित्रालाई इजरायली क्लब होपाइल रानान महिला फुटबल क्लबले गत जुनमा एक वर्षका लागि अनुबन्धित गरेको थियो ।

सावित्राको बिदाइ कार्यक्रममा युवा तथा खेलकुदमन्त्री डिगबहादुर लिम्बु, नेपालका लागि इजरायली राजदूत हनान गोडर र अखिल नेपाल फुटबल संघ (एन्फा)का अध्यक्षसँगै अन्य पदाधिकारीहरूको उपस्थिति थियो । 

बिदाइ कार्यक्रममा बोल्दै सावित्राले युरोपको मान्यता पाएको देशमा खेल्नु चुनौती भए पनि आफू त्यसका लागि तयार रहेको बताइन् ।

“यो माया, सम्मान र बिदाइ आश गरेको थिइनँ । एक दुई दिनमै आएर बिदाइ गरिदिनुभयो । त्यसका लागि धन्यवाद । एसियाली देशबाट एक पाइला अघि बढेको छु । युरोपको मान्यता पाएका देशको लिगमा खेल्नु चुनौती हो । म यो चुनौती स्वीकार्न तयार छु । यो नेपाली फुटबलरका लागि सुरुआत हो र म अन्तिम परीक्षासम्म पनि तयार रहने छु,” सावित्राले थप्छिन् ।

“फुटबल खेलेर बाँच्न सकिन्छ, केही गर्न सकिन्छ भन्ने सन्देश दिन चाहन्छु । मेरो देशका लागि अझै धेरै गर्न बाँकी छ । मेरो व्यावसायिक फुटबलका लागि इजरायलको यात्रामा महिला फुटबल हेर्ने दृष्टिकोण फरक बनाउने कोसिस गर्नेछु । आउने पुस्ताका लागि मैले बाटो बनाउनका लागि आधार तयार गरेको छु । आउने दिनमा यत्तिकै सहयोग गरिदिनु हुने छ भन्ने आशा गरेको छु ।”

एन्फाका अध्यक्ष नेम्वाङले सावित्रालाई युरोपमा खेल्ने अवसर दिएकोमा इजरायली क्लबलाई धन्यवाद दिए ।

"इजरायलमा लिग खेल्ने र युरोपमा खेल्ने जुन अवसर प्राप्त भएको छ । त्यसको लागि क्लबलाई पनि धन्यवाद भन्न चहान्छु," सावित्रालाई शुभकामना दिँदै एन्फा अध्यक्ष पंकजविक्रम नेम्वाङले भने ।

नेपालका लागि इजरायली राजदूत हनान गोडरले पनि सावित्रालाई इजरायलले पर्खिरहेको बताए ।

“रानान उत्कृष्ट टिम हो र मैले रानानलाई नजिकबाट चिनेको छु । सबैले इजरायलमा तपाईंलाई पर्खिरहेका छन् । इजरायलको फुटबल तपाईंलाई स्वागत गर्दछ ।"

गोडरले एम्बसेस्सी इजरायलको तर्फबाट उनलाई शुभकामना दिए । इजरायलको एम्बेसी र सावित्राले हस्ताक्षर गरेर फुटबल साटासाट गरेका थिए । 

यस्तै, खेलकुदमन्त्री डिगबहादुर लिम्बुले सावित्रालाई नेपाली फुटबल विकासमा प्रयोग गर्न सकिने गरी कौशलता सिकेर आउन शुभकामना दिए ।

“उहाँको यात्रा अघि बढोस् भन्ने शुभकामना छ । यो अवसरबाट नेपाली फुटबलको विकासमा प्रयोग गर्न सकिने गरी फुटबल कौशलको विकास गरेर आउनुहोस्,” मन्त्री लिम्बुले भने, “आफ्नो कला प्रदर्शन गरेर अघि बढ्न सक्ने गरि क्षमता प्रस्तुत गर्नुहोला । नेपालमा लामो समय काम गरेका एम्बासडर छन् । खेलको माध्यमबाट संसारमा चिनिन सक्छौँ ।”

भौगोलिक रूपमा एसियामा रहे पनि इजरायलले युरोपेली फुटबल महासंघ (यूईएफए) को सदस्यता लिएको छ । यसैकारण इजरायलका क्लबहरूले युरोपियन च्याम्पियन्स लिगमा प्रतिस्पर्धा गर्न पाउँछन् । इजरायलको महिला क्लबहरूले पनि यो अवसर प्राप्त गर्छन् । तर, महिला च्याम्पियन्स लिग खेल्नका लागि प्लेअफ चरण पार गर्नुपर्ने हुन्छ ।

सशस्त्र प्रहरी बलको एपीएफ क्लबबाट घरेलु लिग खेल्ने सावित्राले भारतको आई लिग र इन्डियन वुमन्स लिगसमेत खेलिसकेकी छन् । गएको सिजन गोलकुल केरलाले इन्डियन वुमन्स लिगको उपाधि जित्दा २९ गोलसहित सावित्रा प्रतियोगिताकै उच्च गोलकर्तासमेत बनेकी थिइन् ।