काठमाडौं । नेपाली कांग्रेसका महामन्त्री गगन थापाले आजदेखि सुरु भएको केन्द्रीय समिति बैठकमा ‘डिजिटल कांग्रेस’को अवधारणा अघि सारेका छन् । 

"यसले पार्टी अभिलेख र कार्यप्रणाली व्यवस्थित र चुस्त हुने छ," महामन्त्री थापाले भने । 

उनको अवधारणा अनुसार पार्टीको सम्पूर्ण अभिलेख, बैठक, सञ्चार र सम्पर्कलगायतको डिजिटलाइज्ड सिस्टममा हुने छ ।

"डिजिटल अभिलेख प्रारम्भ गरिएको छ । कांग्रेस सदस्यता अनलाइन प्रारम्भ भएको छ," उनले भने । 

उनले क्रियाशील सदस्यताको जिल्लाबाटै अनलाइन प्रिन्ट गर्न सकिने जनाए । उनले थप स्पष्ट पारे, "प्रत्येक तहको बैठकको निर्णय प्रणालीमा जोड्ने गरी प्रणालीको विकास गरिँदै छ ।"

कांग्रेसको भ्रातृ तथा सुभेच्छुक संस्थाको सदस्यतालगायतको विवरणलाई पार्टीको सिस्टममा राखिने उनले बताए ।