पोखरा । पोखरा अन्तर्राष्ट्रिय विमानस्थल उद्घाटन भएको झन्ड‌ै सात महिनापछि विमानस्थलमा आयल निगमको हवाई इन्धन डिपो निर्माण गर्न शिलान्यास गरिएको छ । जबकि अन्तर्राष्ट्रिय विमानस्थलमा इन्धन डिपोलाई सुरुमा नै स्थापना गर्नुपर्ने संरचनाको रूपमा लिइन्छ ।

तर, यसअघि क्षेत्रीय विमानस्थलमा रहेको डिपोबाट नै अन्तर्राष्ट्रिय विमानस्थलबाट उडान भर्ने विमानहरूले इन्धन भर्दै आएका थिए । आयल निगमले रिफ्युलरबाट जहाजमा आवश्यक पर्ने हवाई इन्धन ओसार्दै आएको छ । ११ हजार लिटर क्षमता भएका दुईवटा रिफ्युलरले विमानस्थलका जहाजमा इन्धन भर्ने गर्दै आएका छन् ।

पोखरा विमानस्थल प्रमुख विक्रमराज गौतमका अनुसार आइतबार शिलान्यास गरिएको डिपो आगामी डेढ वर्षभित्र निर्माण भइसक्ने छ ।

सोमबार उद्योग वाणिज्य तथा आपूर्तिमन्त्री रमेश रिजालले यसको शिलान्यास गरेका हुन् ।

अहिले आयल निगमले करिब ७७ करोड रुपैयाँ खर्चिएर हवाई इन्धन डिपो निर्माण गर्न लागेको हो । यसका लागि निगमले नागरिक उड्डयन प्राधिकरण प्राधिकरणसँग पोखरा विमानस्थलमा रहेको जग्गा लिजमा लिएको छ ।

कुल ३६ लाख लिटरका हवाई इन्धन भण्डारण ट्यांक निर्माण गर्न लागिएको हो । ७७ करोड रुपैयाँको परियोजनाका लागि भारतीय कम्पनी बीएचएनसँगको सहकार्यमा रेलिगेयर कन्सट्रक्सन र समानान्तरले ठेक्का पाएका छन् भने करिब डेढ वर्षभित्र निर्माण सम्पन्न गर्ने लक्ष्य लिइएको निगमका हवाई इन्धन डिपोका परियोजना प्रमुख भरत रेग्मीले जानकारी दिए ।

रेग्मीका अनुसार विमानस्थलभित्रै १२ लाख लिटर क्षमताका तीनवटा ट्यांकी निर्माण हुने छन् । 

“अहिलेसम्म पुरानै विमानस्थलबाट ढुवानी गरेको भरमा कामचलाउ गरिएको थियो । तर, अब भने अन्तर्राष्ट्रिय विमानस्थलभित्र नयाँ भण्डारणगृह तयार हुने छ,” उनले भने । इन्धन भर्ने तीनवटा ट्यांकी, फायर फाइटिङका लागि आवश्यक पूर्वाधार, प्रशासन सहितका पूर्वाधार बन्ने छन् ।

अहिले आन्तरिक उडानमा मात्र पोखरा अन्तर्राष्ट्रिय विमानस्थल सीमित छ । आन्तरिक उडानमा मात्र सीमित रहँदा विमानस्थलमा दैनिक २० देखि ३० हजार लिटर हवाई इन्धन खपत हुने गरेको छ । अन्तर्राष्ट्रिय विमानस्थल भएकाले अन्तर्राष्ट्रिय उडान सञ्चालन हुनासाथ इन्धन खपत बढ्ने रेग्मीले बताए । 

आयल निगमले मुलुकका ६ वटा विमानस्थलमा हवाई इन्धन डिपो निर्माण गर्ने योजना बनाएको छ । विमानस्थलमा इन्धन डिपो नहुँदा जहाजलाई इन्धन दिन कठिनाइ भएपछि निगमले कदम चालेको हो ।

जनकपुर, सिमरा, भरतपुर, दाङ, मन्थली, झापालगायतका ठाउँमा हवाई इन्धन डिपो निर्माण गर्न आवश्यक रहेको अध्ययनमा देखिएको थियो । निगमको अहिले त्रिभुवन अन्तर्राष्ट्रिय विमानस्थल, पोखरा, विराटनगर, भद्रपुर, भैरहवा, सुर्खेत, नेपालगन्ज र धनगढीमा इन्धन डिपो छ । 

मुलुकभर सञ्चालनमा रहेका २९ मध्ये नौवटा विमानस्थलमा मात्र निगमले हवाई इन्धन बिक्री गरे पनि २० वटा विमानस्थलमा हवाई इन्धन डिपो छैन । डिपो नभएका विमानस्थलमा हवाई जहाजले सम्बन्धित एयरपोर्टमा जाँदा आउँदाको इन्धन त्रिभुवन अन्तर्राष्ट्रिय विमानस्थलबाटै बोकेर जानुपर्ने बाध्यता छ ।