काठमाडौं । श्रम स्वीकृत लिएर वैदेशिक रोजगारीमा जान लागेका श्रमिकलाई फर्काइएको विरोधमा अध्यागमन कार्यालयअगाडि प्रदर्शन भएको छ । 

वैदेशिक रोजगार ऐन २०६४ अनुसार सम्पूर्ण कानुनी प्रक्रिया पूरा गरी संस्थागत रूपमा श्रम स्वीकृत लिएर वैदेशिक रोजगारीमा कुवेत, जोर्डनलगायत विभिन्न देशहरूमा जान लागेका कामदारहरुलाई त्रिभुवन अन्तर्राष्ट्रिय विमानस्थलबाट फर्काइएको थियो । सोही कारण आइतबार नेपाल वैदेशिक रोजगार व्यवसायी संघले विरोध प्रदर्शन गरेको हो । 

उनीहरूले अध्यागमनको बिनाकारण विदेश जानबाट रोक्ने कदमले  व्यवसाय गर्न समस्या हुने भन्दै विरोध गरेको बताइएको छ । नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले बिनाकारण अध्यागमन विभागले कामदार विदेश जानबाट रोकेका कारण विरोध गर्नुपरेको बताए । 

उनले भने, “कुवेत, जोर्डन लगायतका देशमा नेपाली दाजुभाई दिदिबहिनी गइरहनुभएको छ, उहाँहरूलाई बिनाकारण अध्यागमनले फर्कायो, करिब १९० भन्दा बढीको संख्यामा फर्काइएको छ । ठूलो रूपमा टिकट काटिएको, खर्च गरिएको हुन्छ, सबै प्रक्रिया पु¥याएर जाँदा अन्तिममा उहाँहरूलाई फर्काइन्छ, दुःख दिइन्छ, त्यसको विरुद्ध हामीले विरोध गरेका हौँ ।” 

उनले अध्यागमन विभागले नागरिकलाई दिएको दुःख र उनीहरूलाई जान नदिँदा भएको क्षतिपूर्ति नदिएसम्म आन्दोलन गर्ने चेतावनी दिएका छन् । अध्यागमनले कामदारलाई विदेश जान नदिने हो भने व्यवसाय नै बन्द गर्ने चेतावनी समेत दिए ।