काठमाडौं । झापा, मोरङ र धनकुटाको छुट्टाछुट्टै स्थानमा सवारी दुर्घटना हुँदा चारजनाको मृत्यु भएको छ । 

बिहीबार झापाको शिवसताक्षी नगरपालिका–१ स्थितमा पश्चिमबाट पूर्वतर्फ आउदै गरेको प्र. १–०१–००२ ह २६७ नम्बरको अटो र सोही दिशातर्फ जादै गरेको मे. ७ प ८५९४ नम्बरको मोटरसाइकल एकआपसमा ठोक्किँदा दुर्घटना भएको थियो । 

दुर्घटनामा परी मोटरसाइकलमा पछाडि सवार बुद्धशान्ति गाउँपालिका–७ का ४० वर्षीय उपेन्द्र सिग्देलको लाइफलाइन अस्पताल दमकमा उपचारको क्रममा मृत्यु भएको प्रहरीले जानकारी दिएको छ । दुर्घटनामा चालक अर्जुनधारा नगरपालिका–११ का ५७ वर्षीय जीवन सुवेदीको उपचार भइरहेको छ । 

त्यस्तै, झापाको मेचीनगर नगरपालिका–१२, मेची राजमार्गस्थितमा मे १ ज २९३३ नम्बरको गाडीले पैदलयात्रीलाई ठक्कर दिँदा स्थानीय ३५ वर्षीय राजन विकको घटनास्थलमै मृत्यु भएको हो । 

यसैगरी मोरङको सुन्दरहरैचा नगरपालिका–१ स्थितमा को १० प ९०१८ नम्बरको मोटरसाइकल आफँै अनियन्त्रित भइ दुर्घटना हुँदा चालक स्थानीय २४ वर्षीय नवीन चौधरीको मृत्यु भएको हो । 

धनकुटा नगरपालिका–९, त्रिवेणी–मुलघाट भित्री सडक खण्डमा को. ६ प २१४९ नम्बरको मोटरसाइकल आफँै अनियन्त्रित भइ दुर्घटना हुँदा मोटरसाइकलमा पछाडि सवार एकजनाको मृत्यु भएको छ । 

दुर्घटनामा सहिदभूमि–१ का ६५ वर्षीय नरबहादुर राईको मृत्यु भएको प्रहरीले जानकारी दिएको छ ।