काठमाडौं । एसीसी मेन्स इमर्जिङ टिम्स एसिया कपमा भारत ‘ए’ ले युनाइटेड अरब इमिरेट्स (यूएई) ‘ए’ विरुद्ध आठ विकेटको सहज जित निकालेको छ ।

शुक्रबार श्रीलंकाको सिंहालिज स्पोर्ट्स क्लब मैदानमा सम्पन्न खेलमा यूएईले प्रस्तुत गरेको १७६ रनको लक्ष्य भारतले २६.३ ओभरमा दुई विकेट गुमाएर पूरा गर्‍यो ।

भारतको जितमा कप्तान यश धुलले अविजित १०८ रन बनाए । धुलले ८४ बलमा २० चौका र एक छक्का प्रहार गरे । यस्तै, धुलसँगै अविजित रहेका निकिन जोसले ४१, अभिषेक शर्माले १९ र साई सुदर्शनले आठ रन जोडे ।

यूएईका मुहम्मद जवादुल्लाह र अली नासिरले समान एक विकेट लिए ।

त्यसअघि टस हारेपछि ब्याटिङमा आएको यूएईले निर्धाति ५० ओभरमा नौ विकेट गुमाएर १७५ रनको योगफल खडा गरेको थियो ।

यूएईका अश्वन्थ भाल्थापाले ४६ रन बनाएका थिए । आर्यन्स शर्माले ३८, मोहम्मद फराजुद्दिनले ३५, जस गियानानीले १३ र कप्तान अली नासिरले १० रन जोडे ।

भारतका हर्षित रानाले चार विकेट लिए । नौ ओभर बलिङ गरेका हर्षितले ४१ रन खर्चिए । नितिशकुमार रेड्डी र मानव सुथरले समान दुई विकेट लिए । अभिषेक शर्माले एक विकेट हात पारे ।

जितसँगै दुई अंक जोडेको भारत समूह ‘बी’ को शीर्ष स्थानमा छ । अंकविहीन यूएई भने तालिकाको चौथो स्थानमा छ ।

प्रतियोगितामा नेपालसहित एसियाका आठ टिम सहभागी छन् । सहभागी टिमलाई दुई समूहमा विभाजन गरिएको छ । प्रतियोगिताको समूह ‘ए’मा ओमान, अफगानिस्तान, बंगलादेश र श्रीलंका छन् । समूह ‘बी’मा नेपाल, भारत, पाकिस्तान र यूएई छन् ।