काठमाडौं । जातीय विभेदका कारण हुने हिंसाजन्य घटना शृङ्खलाबद्ध रूपमा बढ्दै गएको भन्दै काठमाडौंमा प्रदर्शन गरिएको छ ।

जात व्यवस्था उन्मुलन मोर्चा, नेपालले जातीय विभेदका कारण घटेका शृङ्खलाबद्ध घटनाविरुद्ध बुधबार काठमाडौंको माइतीघरमा विरोध प्रदर्शन गरेको हो ।  

जुम्लामा अन्तरजातीय विवाह गरेको विरोधमा घर जलाइएको, दाङमा डेराबाट निकालिएकोलगायतका प्रतिनिधिमूलक घटनाका साथै देशभर भएका जातीय विभेदविरुद्ध मोर्चाले खबरदारी गरेको हो ।

प्रदर्शनमा सहभागीहरूले 'लडौँ जात व्यवस्थाविरुद्धको फाइनल म्याच', 'अपराधीलाई कारबाही गर', 'मलाई विभेद स्वीकार्य छैन', 'षड्यन्त्रकारी प्रहरी प्रशासन र अदालत मुर्दावाद' लगायतका प्लेकार्ड प्रदर्शन गरेका थिए ।

उनीहरूले जातीय विभेदका कारण हिंसाजन्य घटनामा पीडितलाई छिटो न्याय र पीडकलाई कडा कारबाही गर्नुपर्ने माग राखेका छन् ।