काठमाडौं । उत्तर एटलान्टिक सन्धि संगठन (नेटो)ले युक्रेनलाई सदस्यता दिने संकेत गरेको छ । मंगलबार लिथुआनियामा नेटोको शिखर सम्मेलनमा महासचिव जेन्स स्टोल्टनबर्गले सदस्यताबारे युक्रेनले सकारात्मक सन्देश पाउने बताएका छन् । 

सन् २००८ मा सदस्यता लिन पहल गरेयता युक्रेनले लामो अवधि पार गरेको बताउँदै उनले अर्काे चरण सदस्यताको हुने बताएका छन् । नेटोका महासचिव स्टोल्टनबर्गले भनेका छन्, “युक्रेन नेटोसँग धेरै नजिक छ । त्यसैले नेटो निर्णयलाई प्रतिविम्बित गर्ने समय आएको मलाई लाग्छ ।”

सम्मेलनमा सबै सदस्या राष्ट्र उपस्थित भएको भन्दै उनले सदस्यताको एक्सन प्लान हटाएर युक्रेनलाई सकारात्मक र बलियो संकेत दिने बताएका छन् ।

बेलारुसमा रहेका वाग्नर समूहका लडाकुले कुनै गतिविधि नगरेको र आफूहरूले स्थितिलाई नजिकबाट नियालिरहेको उनको भनाइ छ । 

युक्रेनलेसमेत नेटोको सम्मेलनलाई नजिकबाट हेरिरहेको छ । बुधबार लिथुआनियामा अमेरिकी राष्ट्रपति जो बाइडेनले युक्रेनका राष्ट्रपति भोलोदिमिर जेलेन्स्कीसँग 'वान टू वान' भेटवार्ता गर्ने छन् ।

यसअघि सोमबार टर्कीका राष्ट्रपति रेसेप तैयप एर्दाेगानले स्विडेनलाई नेटोमा सामेल हुन दिन सहमत भएको बताएका छन् । नेटोका महासचिव जेन्स स्टोल्टनबर्गले सोमबार यस्तो घोषणा गरेका हुन् । हंगेरीले पनि स्विडेनको सदस्यता समर्थन गर्ने संकेत गरेको छ ।

अल्जजिराबाट ।