खैबर पख्तुनख्वा (पाकिस्तान) । पाकिस्तानको मार्तुङ खास शांगला जिल्लामा बालुवाको ढिस्कोमा पुरिएर आठ बालबालिकाको मृत्यु भएको छ ।

क्रिकेट खेलिरहेका बालबालिकामाथि बालुवाको ढिस्को खस्दाँ उक्त हताहति भएको उद्धारकर्मीलाई उद्धृत गर्दै एआरवाई न्यूजले जनाएको छ । एक बालकलाई जीवित उद्धार गरिएको तथा अन्य एकजनाको खोजी भइरहेको छ । दुर्घटनाका बेला १० बालबालिका क्रिकेट खेलिरहेका बताइएको छ । बुधबार बिहानैदेखि परेको अविरल वर्षाका कारण बलौटे ढिस्को खसेको हो । 

यसैबीच, गत मे महिनामा सिन्धको संघार जिल्लाको अचरो थार क्षेत्रको एउटा घरमा आगलागी हुँदा चार बालबालिकाको मृत्यु भएको थियो ।

उक्त दुर्घटनामा एकै परिवारका दाजुभाइको ज्यान गएको थियोभने बाबु घाइते भएका थिए । त्यसअघि मार्चमा तल्लो कोहिस्तानको पट्टन क्षेत्रको घरमा आगलागी हुँदा एक महिला, उनकी सासु, पाँच छोरी र तीन छोरासहित एकै परिवारका १० सदस्यको मृत्यु भएको थियो । रासस/एएनआई