धनकुटा । पूर्वकृषि तथा सहकारीमन्त्री छविलाल विश्वकर्माले नेपालमा व्यवस्था परिवर्तन भए पनि अवस्था परिवर्तन नभएकाले दलित समुदायको मुक्ति हुन नसकेको बताएका छन् ।
दलित महिला सङ्घ (फेडो) धनकुटाको आयोजनामा धनकुटाको हिलेमा जारी दुई दिने कोसी प्रदेशस्तरीय कार्यशाला गोष्ठीमा उनले भने, “पटक–पटक भएको राजनीतिक सङ्घर्षमा दलितले आफ्नो ज्यानको आहुति दिएका छन् । तर पनि उनीहरूको अवस्था उस्तै छ ।”
दलित समुदाय पछि पर्नुको प्रमुख कारणमध्ये सत्ताको बागडोरमा पुगेकाहरूले बेवास्ता गर्नु पनि एक महत्त्वपूर्ण कारण भएकाले दलितले सत्ता सञ्चालनका नीति जान्नुपर्ने उनको धारणा थियो । संविधान र कानुनमा अधिकार लेखिए पनि दलित स्वयं एकजुट भएर सङ्घर्ष नगरेसम्म दलितले अधिकार पाउने अवस्था नरहेको उनको भनाइ थियो ।
कार्यशालामा डा डम्बर चेम्जोङ र धनकुटाका दलित अभियन्ता नैन विश्वकर्माले दलित समुदायको अवस्थाबारेमा कार्यपत्र प्रस्तुत गरेका थिए । कार्यशालालाई ध्यानाकर्षण गराउँदै अभियन्ता विश्वकर्माले छुवाछूत नमान्ने युरोपेलीलाई समेत प्रवासी नेपालीले विभेद गराउन सिकाउने गरेको किस्सा सुनाए । रासस