काठमाडौं । प्रधानमन्त्री पुष्पकमल दाहाल ‘प्रचण्ड’ले विगतका नीति तथा कार्यक्रमबाट पाठ सिक्दै आउँदो वर्षको नीति तथा कार्यक्रम र बजेट ल्याउने तयारी भइरहेको बताएका छन् ।

सिंहदरबारमा शनिबार बसेको नेकपा (माओवादी केन्द्र) संसदीय दलको बैठकमा उक्त पार्टीका अध्यक्ष समेत रहेका प्रचण्डले सुशासन, समृद्धि र सामाजिक न्यायको विषय सरकारले सुरुदेखि नै उठाएको र त्यसलाई मध्यनजर गर्दै कार्यक्रम र बजेट ल्याइने बताए ।

राष्ट्रियस्तरका सूचकमा पछाडि परेका समुदायलाई माथि उठाउने र उत्पादन, उत्पादकत्वमा वृद्धिका साथै रोजगारी बढाउनका निम्ति आवश्यक सुझाव दिन उनले आग्रह गरेको बैठकपछि प्रमुख सचेतक हितराज पाण्डेले  जानकारी दिए ।

संसद्को बजेट अधिवेशनमा सक्रिय भएर भूमिका निर्वाह गर्न अध्यक्ष प्रचण्डले सांसदहरूलाई निर्देशन दिएका थिए । उनले यसअघि संसद्‌मा देखिएको अवरोध हटाउने विषयमा पनि दलहरूबीच निरन्तर छलफल भइरहेको उल्लेख गरे । त्यसबारे छिटै सर्वदलीय बैठक बस्ने उनले जानकारी गराएको प्रमुख सचेतक पाण्डेले बताए ।

बैठकमा अर्थमन्त्री वर्षमान पुनले सरकारको नीति तथा कार्यक्रमका साथै बजेटको तयारीका बारेमा जानकारी गराएका थिए ।

बजेट निर्माणमा सहयोगी भूमिका खेल्न त्यसक्रममा माओवादी सांसदहरूलाई निर्देशन दिइएको पाण्डेले बताए । हिमालन टेली भ्वाइस