काठमाडौं । कर्णाली प्रदेशमा रोजगारको अवसर खुम्चिँदै गएको छ । यस प्रदेशमा नयाँ उद्योग दर्ता हुन छाडेसँगै रोजगारीका अवसरहरू पनि खुम्चिँदै गएको नेपाल राष्ट्र बैंकको प्रतिवेदनले देखाएको हो ।

नेपाल राष्ट्र बैंकले सार्वजनिक गरेको ‘आर्थिक गतिविधि अध्ययन, अर्ध वार्षिक २०७९/८०’ को प्रतिवदेनअनुसार पुस मसान्तसम्म कर्णाली प्रदेशमा कुनै पनि उद्योग दर्ता भएका छैनन् ।

आर्थिक वर्ष २०७९/८० को पहिलो ६ महिनामा देशभर साना, मझौला र ठूला गरी थप १४५ उद्योगहरु उद्योग विभागमा दर्ता भएका छन् । राष्ट्र बैंकको तथ्याङ्कअनुसार चालु आर्थिक वर्षको पहिलो ६ महिनामा कर्णाली प्रदेशमा उद्योग दर्ता भएका छैनन् । यसले गर्दा कर्णालीमा नयाँ रोगजारका संख्या न्यून रहेको छ ।

कुन प्रदेशमा कतिले रोजगारी पाए ?

चालु आर्थिक वर्ष २०७९/०८० को पहिलो ६ महिनामा सबैभन्दा धेरै वाग्मती प्रदेशमा ५९ वटा उद्योग दर्ता भएका छन् । यस प्रदेशमा तीन हजार ३१८ जनाले रोजगारी पाएका छन् ।

लुम्बिनीमा २५ वटा उद्योग दर्ता हुँदा एक हजार ९५५ जनाले रोजगारी पाएका छन् । यस्तै, कोसी प्रदेशमा पनि २५ उद्योग दर्ता हुँदा पनि एक हजार ९७७ जनाले रोजगारी पाएका छन् ।

गण्डकी प्रदेशमा दर्ता भएका १९ वटा उद्योगहरूले एक हजार १९३ जनालाई रोजगार दिएका छन् । मधेस प्रदेशमा १३ वटा उद्योग दर्ता हुँदा एक हजार ९९ जनाले रोजगार पाएका छन् ।

यस्तै, सुदूरपश्चिम प्रदेशमा सबैभन्दा कम चारवटा उद्योग दर्ता भएका छन् । जसबाट १७६ जनाले रोजगार पाएका छन् ।