काठमाडौं । लिबियाको पूर्व भूमध्यसागरको तटमा रहेको बन्दरगाह सहर तोब्रुकबाट जुन ८ मा ७५० आप्रवासी बोकेको माछा मार्ने डुंगा ग्रिसको यात्रामा छुटेको थियो । तर, १४ जुनमा यो डुंगा दुर्घटनामा पर्याे, जुन भूमध्यसागरको सबैभन्दा त्रासदिपूर्ण जहाज दुर्घटना हुन पुगेको छ । लिबियाबाट चढेका आप्रवासीमध्ये १०४ जनामात्रै ग्रिस पुगे ।

डुंगा चढेर युरोप पुग्ने सपना बोक्नेमध्ये एक थिए– थायर खालिद अल रहल । सिरियाली युद्धबाट ज्यान जोगाउन भागेका थायर खालिद अल रहलको परिवार एक दशकदेखि जोर्डन शरणार्थी शिविरमा बस्दै आएको थियो ।

गत वर्ष चार वर्षीय छोरालाई ल्युकेमिया देखिएपछि संयुक्त राष्ट्रसंघीय शरणार्थी एजेन्सीले कुनै उपचार खर्च नदिएपछि र कतै बसोबासको व्यवस्था समेत नगरेपछि उनी छोराको ज्यान जोगाउन युरोप छिर्नुपर्ने भयो ।

इजिप्टबाट २७ वर्षीय मोहम्मद अब्देलनासरले सिकर्मीको कामले आफ्नी श्रीमती र दुई छोरालाई पाल्न नसकेपछि युरोपको यात्रा थालेका थिए ।

४२ वर्षीय मतलूब हुसैनको ग्रिक रेसिडेन्सी नवीकरण नहुँदा उनलाई पाकिस्तान फिर्ता पठाइयो । पाकिस्तानमा कुनै आम्दानी नहुँदा आर्थिक संकटको बीच २० जनाको परिवार पाल्न उनी फेरि युरोपको यात्रामा लागेका थिए ।

डुंगामा करिब आधा (३५० भन्दा बढी) पाकिस्तानी र बाँकी अन्य देशका नागरिक थिए । आइबारसम्म ८२ जना मृत फेला परेका छन् भने अन्य भूमध्यसागरमा हराएका छन् । बाँच्न सफल १०४ जनामा ४७ सिरियाली, ४३ इजिप्टियन, १२ पाकिस्तानी र दुई प्यालेस्टिनी नागरिक रहेका छन् ।

आप्रवासीहरुले ग्रिस पुर्याइदिन भनेर तस्करहरूलाई हजारौँ अमेरिकी डलर बुझाएका थिए । लिबियाबाट डुंगा छुट्नुअघि उनीहरुले विजोगपूर्ण अवस्थामा कयौँ दिन पर्खिनुपरेको थियो ।

पहिले नै ग्रिसमा बसिसकेका पाकिस्तानी मतलूब हुसेनले आफ्नो भाइलाई फोन गरेर डुंगाको हालत एकदमै खराब रहेको बताएका थिए । उनले मानिसहरुलाई डुंगामा गाईवस्तुजस्तै खाँदेर हालेको भनेका थिए ।

जुन १४ मा डुंगा पल्टिएकै बेला उता अर्बपतिहरु उत्तरी एट्लान्टिकमा टाइटानिकको भग्नावशेष नजिकै यात्राको तयारीमा थिए । पाँचजना चढेको उनीहरुको पनडुब्बी १८ जुनमा बेपत्ता भएसँगै तत्काल ठूलो खर्च गरी विभिन्न देशले खोज र उद्धार कार्य गरेका थिए ।

तर, ७५० बढी शरणार्थी र आप्रवासीले भरिएको डुंगाका लागि भने त्यस्तो केही भएको थिएन । यसमा सवारमध्ये दर्जनौँ बालबालिका र परिवारको आम्दानीका मुख्य स्रोत थिए । भूमध्यसागरमा विलय भएका यी व्यक्तिहरुको उद्धार प्रक्रियामाथि समेत आशंका गरिएको छ ।

यस्तै, यो घटनाले आप्रवासीप्रति युरोपेलीहरुको दृष्टिकोण र युरोपमा अप्रवासी संकटलाई थप उजागार गरेको समेत भनिएको छ । -द वासिंटन पोस्टबाट ।