काठमाडौं । धितोपत्र दोस्रो बजारमा कारोबार गर्न ट्रेड म्यानेजमेन्ट सिस्टम (टीएमएस)  लिनेको संख्या बढ्दै गएको छ । 

नेपाल स्टक एक्सचेन्ज (नेप्से)का अनुसार जेठसम्म टीएमएस लिनेको संख्या १९ लाख २६ हजार पुगेको छ । तर, टीएमएस लिनेमध्ये एक लाख ४२ हजारले भने आफै सेयर कारोबार गर्दैनन् । 

उनीहरूले ब्रोकरलाई नै आफ्नो सेयर खरिद र बिक्री गर्न निर्देशन दिने गरेका छन् । बाँकी १६ लाख ८४ हजारले भने अनलाइनबाट आफै सेयर खरिद–बिक्री गर्ने गरेका छन् ।

नेप्सेका प्रवक्ता मुराहरि पराजुलीका अनुसार दोस्रो बजारमा कारोबार गर्न टीएमएस लिनेहरू सबैले कारोबार भने गर्दैनन् । 

कारोबार बढेको बेलामा मात्र सदाको भन्दा बढीले कारोबार गर्ने गरेका छन् । कारोबारको समयमा हाल २५ देखि ३० हजारसम्मले लगइन गरेर बसेका हुन्छन् । यसरी लगइन गर्ने सबैले कारोबार गरेकै हुन्छन् भन्ने हुँदैन । 

“दोस्रो बजारमा कारोबार गर्न टीएमएस लिने सबैले कारोबार गर्दैनन् । बजार बढेको बेला मात्र बढी सक्रिय हुने गरेका छन्,” उनले भने, “अहिले पनि दैनिक ३० हजारले कारोबार गरेको देखिन्छ । उनीहरूले बजारलाई वाच गरेर बसेका हुन्छन् ।”

त्यस्तै, सेयर जम्मा गर्न खोलिने डिम्याट खाताको संख्या ५७ लाख १८ हजार १८९ पुगेको सिडिएस एण्ड क्लियरिङ लिमिटेड (सीडीएससी)ले जानकारी दिएको छ । त्यसैगरी अनलाइनबाट प्राथमिक सेयर (आईपीओ)मा आवेदन दिन मेरो सेयर खाता ४७ लाख ९१ हजार ८८० जनाले खोलिसकेका छन् ।

डिम्याट खाता खोल्नेको संख्या बढे पनि आईपीओमा आवेदन दिने भने कम छन् । भर्खरै आईपीओ निष्कासन गरेको थ्रीस्टार हाइड्रोपावर लिमिटेडको आईपीओमा अन्तिम दिनसम्म १० लाख ९२ हजारले आवेदन दिएका थिए ।  नेपाल धितोपत्र बोर्डका अनुसार हालसम्म सबैभन्दा बढी आईपीओमा आवेदन दिनेको संख्या २७ लाख ३० हजार थियो । त्यसयता आईपीओमा आवेदन दिनेको संख्या घट्दै गएको बताइएको छ ।