काठमाडौं । सरकारले काठमाडौंको कालीमाटीमा टमाटर फालेको विषयमा छानबिन थालेको छ । कृषि तथा पशुपन्क्षी विकासमन्त्री बेदुराम भुसालले कालीमाटीमा टमाटर फाल्ने कार्यमा किसानको सहभागिता नरहेको भन्दै थप छानबिन भइरहेको जानकारी दिए ।

सिंहदरबारमा बिहीबार बसेको प्रतिनिधिसभाअन्तर्गतको कृषि, सहकारी तथा प्राकृतिक स्रोत समितिको बैठकमा मन्त्री भुसालले टमाटर फाल्ने कार्य राजनीतिक प्रेरित रहेको आफूलाई आशंका रहेको बताए । 

किसानबाट न्यून मूल्यमा तरकारी खरिद गर्ने र उच्च भाउमा बेच्ने प्रवृतिलाई अन्त्य गर्न किसानबाट खरिद गर्ने मूल्य बढाउन र बिक्री मूल्य घटाउन कालीमाटी तरकारी व्यवस्थापन समितिलाई निर्देशन दिएको भोलिपल्ट नै टमाटर फाल्ने काम भएको उनको भनाइ छ । 

असार ३ गते बजार मूल्य नपाएको भन्दै काठमाडौंको कालीमाटी तरकारी बजारस्थित सडकमा गोलभेँडा फ्याँकिएको थियो ।

अर्को प्रसंगमा उनले ७६ जिल्लामा लम्की स्किन रोगको महामारी फैलिएको र यसको उपचार कार्यलाई पनि तीव्रता दिएको जानकारी दिए । उपचारका अन्य विधि अपनाएर पशु चौपायालाई बचाउने काम भएको उनको भनाइ छ ।