काठमाडौं । उच्च अदालत पाटनले काठमाडौंका सिनेमा हलमा भारतीय चलचित्रको प्रदर्शन नरोक्न अल्पकालीन अन्तरिम आदेश जारी गरेको छ । नेपाल चलचित्र संघले दायर गरेको रिटमा बिहीबार अदालतले भारतीय सिनेमा प्रदर्शन नरोक्न अल्पकालीन अन्तरिम आदेश जारी गरेको हो । 

अदालतले सेन्सर बोर्डले अनुमति दिएका कुनै पनि चलचित्रको प्रदर्शन नरोक्न पनि आदेश दिएको छ । 

काठमाडौं महानगरपालिकाका मेयर बालेन शाहले हिन्दी सिनेमा ‘आदिपुरुष’मा रहेको जानकी भारतीय छोरी हुन् भन्ने आसयको संवाद नहटाएको भन्दै सोमबारदेखि ‘आदिपुरष’सहित भारतीय चलचित्र प्रदर्शनमा रोक लगाएका थिए । बालेनको उक्त निर्णयविरुद्ध चलचित्र संघले बुधबार उच्च अदालत पाटमा रिट दायर गरेको थियो । 

काठमाडौंमा मेयर बालेनले ‘आदिपुरुष’सहित हिन्दी सिनेमा चल्न नदिएपछि पोखरा महानगरपालिका र धरान उपमहानगरपालिकाका मेयरले पनि उक्त सिनेमा चल्न नदिने बताएका थिए ।