काठमाडौं । नेकपा (एकीकृत समाजवादी)ले समाजवादी मोर्चामा सामेल हुने निर्णय गरेको छ ।
आज बसेको केन्द्रीय सचिवालय बैठकपछि उपमहासचिव तथा प्रचार विभाग प्रमुख जगन्नाथ खतिवडाले पहिले नै गरिएको निर्णय बैठकले अनुमोदन गरेको जानकारी दिए । उनले मोर्चाले समाजवादी विचार धारको प्रचार गर्ने बताए ।
“यसले संसद्मा र संसद् बाहिर पनि समाजवादी विचार धाराको प्रचार गर्नेछ,” उनले भने, “समाजवादका पक्षमा जनमत निर्माण गर्ने । देशको सुशासन, राजनीतिक स्थिरताको पक्षमा वकालत गर्छ ।”
मोर्चाले समाजवादको पक्षमा वकालत गर्नेहरूलाई एक ठाउँमा उभ्याएर लेफ्ट फन्ट बनाउन सहयोग पुर्याउने खतिवडाले बताए । प्रदेश र जिल्लामा पनि मोर्चा बनाइने उनको भनाइ छ ।
मोर्चामा नेकपा माओवादी, एकीकृत समाजवादी, जनता समाजवादी पार्टी रहने र त्यसमा नेत्रविक्रम चन्द विप्लव नेतृत्वको पार्टी पनि आवद्ध हुन छलफल भइरहेको खतिवडाले बताए ।
उनले अन्य दलहरूले पनि पार्टी बैठकबाट निर्णय गर्नुपर्ने भएकाले मोर्चा घोषणा हुन केही दिन लाग्ने पनि बताए । मोर्चा आजै घोषणा हुने चर्चा चलेको थियो ।
