काठमाडौं । सर्वोच्च अदालतका प्रस्तावित प्रधानन्यायाधीश हरिकृष्ण कार्कीले आफूमाथिका आरोप प्रमाणित भए तत्काल पदबाट राजीनामा दिने बताएका छन् ।
शुक्रबार सिंहदरबारमा बसेको संसदीय सुनुवाइ समितिको बैठकमा सांसदले उनीविरुद्धका उजुरीबारे प्रश्न गरेका थिए । जवाफमा उनले आरोपका खण्डन गर्दै आफू न्यायपालिकाको शुद्धताको कुरा गर्ने मान्छे भएको बताए ।
“ममाथि लगाइएका जुन कुरा आए, त्यो कुरा प्रमाणित जुनसुकै बेला भएको अवस्थामा पदबाट तत्काल राजीनामा दिन्छु । कुनै पनि आरोप सत्यतामा आधारित छ भने प्रमाणित भएको भोलिपल्ट नै राजीनामा दिएर निस्किनेछु । होइन भने जे यथोचित हुन्छ, त्यो कदम चाल्नेछु,” उनले भने ।
बहालवाला न्यायाधीशको विषयमा धेरै भन्न सक्दिनँ
उनीविरुद्ध उजुरी गर्नेमा बहालवाला जिल्ला न्यायाधीश श्रीकृष्ण भट्टराई समेत थिए । त्यसबारेमा पनि सांसदले प्रश्न सोधेका थिए ।
जवाफमा उनले भने, “बहालवाला न्यायाधीशको विषयमा धेरै जवाफ दिन सक्ने अवस्थामा छैन । त्यसको पनि नियमनकारी निकाय छ । न्यायपरिषद् छ । त्यसको म अध्यक्ष मात्रै होइन, अरू चारजना हुनुहुन्छ । उहाँलाई स्वच्छ न्याय परेको छ भन्ने पनि दिलाउनुपर्छ । नियमनकारी निकायले गम्भीरतापूर्वक लिन्छ । योभन्दा बढी भन्न सक्दिनँ ।”
कसैको ‘इगो हर्ट’ भएको र कसैले मुद्दा हारेका कारण आफूविरुद्ध उजुरी दिएको जिकिर समेत उनले गरे ।
