काठमाडौं । स्पेन मिडफिल्डर रोड्रीले दोस्रो हाफमा गरेको गोलमा म्यानचेस्टर सिटीले शनिबार राति इन्टर मिलानलाई १–० ले हराउँदै यूईएफए च्याम्पियन्स लिगको उपाधि जितेको छ ।

यससँगै सिटीले ट्रेबल उपाधिको दुर्लभ सफलता हासिल गर्न सफल भएको छ । र, घरेलु लिगको दबदबा तोड्दै युरोपियन लिगमा पनि आफ्नो बर्चश्व बढाउन सफल भएको छ ।

इङ्लिस क्लब सिटीले युरोपेली फुटबलको सबैभन्दा मनमोहक उपाधि जितेको यो पहिलोपटक हो । इटालियन क्लब इन्टरको प्रतिरोध तोड्न रोड्रीले ६८औँ मिनेटमा गरेको निर्णायक बन्यो । बर्नान्डो सिल्भाको ‘कट ब्याक’मा रोड्रीले हानेको प्रहारलाई इन्टरका गोलकिपर आन्द्रे ओनानाले रोक्न सकेनन् ।

त्यसपछि पनि इन्टरले सिटीलाई दबाब दिएको थियो । तर, सिटीका गोलकिपर एडरसनले अन्तिम समयमा दुई उत्कृष्ट बचाउ गरेका थिए । ८८औँ मिनेटमा रोमेलु लुकाकुले ६ यार्ड बक्सबाट हानेको प्रहारलाई एडरसनले गोललाइनबाट खुट्टाले बचाएका थिए । त्यस्तै, इन्जुरी समयमा रोबिन गोसेन्सको हेडिङलाई एडरसनले पञ्च गरेर बचाएका थिए ।

एडरसनको उक्त बचाउसँगै रेफ्री सिमोन मासिर्चनकले समय सकिएको सिटी बजाएका थिए । त्यससँगै सिटीका खेलाडीहरू अतातुर्क रंगशालामा समर्थकतर्फ दौडिएका थिए । र समथकसँग खुशी साटेका थिए ।

“भाग्यमानी पनि हुनुपर्छ ... । यो ताराहरूमा लेखिएको थियो। त्यो हाम्रो लागि थियो,’’ सिटीका प्रशिक्षक पेप ग्वार्डिओलाले भने, “यो सफलतासँगै हामीले ट्रेबल उपाधि जितेका छौं । जुन धेरै कठिन थियो ।’’

सिटीले सन् १९७० मा युरोपियन कप विनर कप उपाधि जितेको थियो । त्यसयता सिटीले पहिलोपटक युरोपियन क्लब फुटबलको उपाधि मात्र जितेको छैन, सिटी ट्रेबल उपाधि जित्ने दोस्रो इङ्लिस क्लब बनेको छ । सिटीले यसअघि इङ्लिस प्रिमियर लिग र एफए कपको पनि उपाधि जितेको थियो । इङ्ल्यान्डमा यस्तो सफलता यसअघि म्यानचेस्टर सिटीले १९९९ मा हासिल गरेको थियो ।

इन्टर भने चौथो पटक उपाधि जित्ने लक्ष्यमा थियो । इन्टरले ग्वार्डिओलाको टिमलाई अन्तिम समयसम्म दबाब पनि दियो । तर, सफलता भने हासिल गर्न सकेन । पहिलो हाफमा सिटीका मिडफिल्डर केभिन डी ब्रुयना घाइते भएपछि इन्टरले दबाब बढाएको थियो । दुई वर्षअघिको फाइनलमा चेल्सीसँग पराजित हुँदा पनि डी ब्रुयना घाइते भएका थिए । इन्टरका रक्षापंक्तिले ‘गोल–मेसिन’को उपमा पाएका इर्लिङ ब्राउट हालान्डलाई पनि खुलेर खेल्द दिएका थिएनन् । त्यस्तो अवस्थामा रोड्रिले गरेको गोल सिटीको जितमा निर्णायक बन्यो ।

“भावनात्मक क्षण रह्यो । एउटा सपना साकार भयो। मलाई थाहा छैन यहाँ वरपरका यी सबै जना कति वर्षदेखी यस क्षणको पर्खाईमा थिए । आज हामी यस जितका लागि हकदार थियौं,’’ सिटीका रोड्रिले बीटी स्पोर्टसँग भने ।

खेल सकिएपछि खेलाडीले प्रशिक्षक ग्वार्डिवलाले खेलाडीहरूलाई अँगालो हाले । सिटीका फ्यानहरूले शेख मन्सुरको नाममा नारा लगाए। २००८ मा मन्सुरले क्लबको स्वामित्व लिएपछि सिटीलाई शृंखलावद्ध रुपमा उपाधि जित्न सफल भएको छ ।

“यो सजिलो थिएन। हामीले कस्तो टिमको सामना ग¥यौं । उनीहरू रक्षापंक्ति र काउन्टर अट्याकमा बलियो थियो । फाइनल यस्तै हुन्छ। भावनात्मक हुन्छौँ, अत्तालिन्छौँ । तर, आज हामीले जनावरहरूले जस्तै प्रतिस्पर्धा गर्यौं,’’ रोड्रीले थपे ।

युनाइटेड अरब इमिरेट्स (यूएई)का शेख मन्सुरले २००८ मा सिटीको स्वामित्व लिएपछि क्लबले १७ वटा उपाधि जितेको छ । तथापी २००९ पछि क्लबमाथि प्रिमियर लिगको वित्तिय नियम उल्लंघन गरेको थुप्रै आरोप लागेको छ ।