काठमाडौं । आफ्नो अन्तिम खेलमा विभागीय टिम एपीएफ क्लबविरुद्ध ४–० को सहज जित निकाल्दै फ्रेन्ड्स क्लबले सहिद स्मारक ‘ए’ डिभिजन लिग क्लबको हैसियत कायम राखेको छ । 

फ्रेन्ड्ससँग लज्जास्पद हार व्यहोरेको एपीएफ भने रेलिगेसन क्षेत्रमा परेको छ । एपीएफ भने अब रेलिगेसन क्षेत्रबाट उठ्न थ्री स्टार क्लब र जावलाखेल युथ क्लबबीचको खेलमा निर्भर छ ।

त्रिपुरेश्वरस्थित दशरथ रंगशालामा सम्पन्न खेलमा फ्रेन्ड्सलाई जित दिलाउन टोरिक जेब्रिन, विकास थापा, रफिक एमिनु र अक्रारब्रेकले समान एक गोल गरे ।

खेलको १५औँ मिनेटमा जेब्रिनले गरेको गोलबाट फ्रेन्ड्सले अग्रता बनाएको थियो । ३१औँ मिनेटमा विकासले गरेको गोलबाट फ्रेन्ड्सले अग्रता दोब्बर पा¥यो । पहिलो हाफमा दुई गोल गरेको फ्रेन्ड्सले दोस्रो हाफमा पनि दुई गोल नै थप्यो । 

७१औँ मिनेटमा एमिनुले गोल गर्दै फ्रेन्ड्सको अग्रतालाई ३–० मा पुर्‍याए । यस्तै, खेलको निर्धारित समय सकिन आठ मिनेट बाँकी रहँदा अक्रोरबेक टिमका लागि चौथो गोल गरेपछि फ्रेन्ड्सले सहज जितसँगै ‘ए’ डिभिजन लिग क्लबको हैसियत पक्का गर्‍यो ।

लिगमा २६ खेलबाट ३० अंक जोडेको फ्रेन्ड्स यो जितसँगै तालिकाको ११औँ स्थानमा उक्लिएको छ । फ्रेन्ड्स रेलिगेसन क्षेत्रमा रहेको थ्री स्टार क्लबभन्दा एक अंक माथि छ । हाल रेलिगेसन क्षेत्रमा थ्री स्टार र खुमलटार छन् । फ्रेन्ड्ससँगको हारपछि १२औँ स्थानमा झरेको एपीएफ क्लबको भने ३० अंक छ ।