काठमाडौं । सत्तारूढ दल नेकपा (एकीकृत समाजवादी)का सांसद कृष्णकुमार श्रेष्ठ (किसान) संसदको रोस्टममा उभिएर मौनधारण गरेका छन् । 

शुक्रबारको संसद् बैठकमा बजेट माथिको छलफलमा बोल्ने क्रममा उनले बजेटले मधेस र यहाँको समुदायलाई उपेक्षा गरेको विरोधमा एक मिनेट मौन धारण गरे । 

उनले बजेट प्रधानमन्त्री, अर्थमन्त्री र मन्त्रीहरूको निर्वाचन क्षेत्रमा केन्द्रित भएको भन्दै विरोध जनाएका हुन् । 

“अहिलेको बजेटमा मधेस/मधेसी र मधेसमा बसोबास गर्नेलाई अपमान भएको छ,” उनले भने, “मन्त्री म पनि भएको हो । एकपटक बजेट मैले पनि ल्याएको हो । तर नांगो रूपमा यसरी नहिँड्नुहोस् । प्रधानमन्त्रीज्यू यो कुरालाई कन्ट्रोल गर्नुहोस् नांगै नहिँड्नुहोस् । तपाईहरूको मात्र निर्वाचन क्षेत्र छैन हाम्रो पनि निर्वाचन क्षेत्र छ हामीले पनि चुनाव जितेर आएको हाम्रो क्षेत्रमा विकास गर्र्नुछ ।” 

सत्तासाझेदार दल भएपनि बजेट यथास्थितिमा पास हुन नदिने भन्दै नेकपा (एकीकृत समाजवादी) बजेटको विपक्षमा उभिएको छ ।