काठमाडौं । सोभियत संघ र रुसका लागि जासुसी गर्ने अमेरिकी संघीय अनुसन्धान ब्युरो (एफबीआई) एजेन्ट रोबर्ट ह्यान्सेनको मृत्यु भएको छ । सोमबार अमेरिकाको एउटा जेलमा उनी मृत फेला परेको बताइएको छ ।

सन् १९८० र ९० को दशमा ह्यान्सेनले रुसलाई गोप्य रूपमा निकै गम्भीर अमेरिकी सूचना उपलब्ध गराएका थिए ।

ह्यान्सनले सन् १९८५ मा सोभियत गुप्तचर निकायसँग जासुसीका लागि प्रस्ताव गरेका थिए । उनले अमेरिकी सरकारको गोप्य कुराको व्यापार सोभियत संघ र पछि रुससँग गरेका थिए । त्यसको बदलामा उनले हिरा र सयौँ हजार अमेरिकी डलर पाएका थिए ।

उनले एफबीआईको प्रमुख न्युयोर्क काउन्टर इन्टेलिजेन्स विभागमा काम गरेका थिए । अमेरिकामा रुसी एजेन्टको खोजी गरिँदा उनी आफूले गरिरहेको काम लुकाउन सफल भएका थिए ।

अन्ततः सन् २००१ को फेब्रुअरी १८ मा वासिंगटनको ठिकबाहिर भर्जिनियामा आफ्ना रुसी ‘ह्यान्डलर’हरूसँग सूचना आदानप्रदान गर्ने क्रममा उनी रंगेहात पक्राउ परेका थिए ।

एक वर्षपछि उनलाई आजीवन कारावासको सजाय सुनाइएको थियो । कोलोराडोको फ्लोरेन्सस्थित अमेरिकी जेलले एक विज्ञप्ति जारी गर्दै ७९ वर्षीय ह्यान्सेन सोमबार बिहान अचेत अवस्थामा भेटिएको र पछि उनलाई मृत घोषणा गरिएको जनाएको छ ।