काठमाडौं । केही दिनयता देशभर गर्मी बढ्दो क्रममा छ । कतिपय स्थानको अधिकतम तापक्रम ४० डिग्री सेल्सियस पुगिसकेको छ ।
मौसम पूर्वानुमान महाशाखाले सार्वजनिक गरेको विवरणमा हाल १४ स्थानको अधिकतम तापक्रम ३० डिग्री सेल्सियसभन्दा बढी छ । महाशाखाले २० स्थानको विवरण सार्वजनिक गरेको छ ।
महाशाखाको पछिल्लो विवरणानुसार जनकपुरको अधिकतम तापक्रम सबैभन्दा बढी ४१ डिग्री सेल्सियस छ । त्यसपछि सिमराको ४०.७, भैरहवाको ४०.५, विराटनगरको ३९.२, नेपालगन्जको ३९, धनगढीको ३८.३, धरानको ३७.५, वीरेन्द्रनगरको ३७.४, घोराहीको ३६.५, दिपायलको ३६.४, पोखराको अधिकतम तापक्रम ३३.२ डिग्री सेल्सियस छ । काठमाडौंको अधिकतम तापक्रम ३२ डिग्री सेल्सियस छ ।
यो आज (शनिबार) दिउँसो मापन गरी सार्वजनिक गरिएको विवरण हो । महाशाखाले हरेक दिन बिहान न्यूनतम र दिउँसो अधिकतम तापक्रम मापन गरी विवरण सार्वजनिक गर्ने गर्छ ।
महाशाखाका अनुसार आज जोमसोमको न्यूनतम तापक्रम सबैभन्दा कम २ डिग्री सेल्सियस मापन गरिएको थियो । त्यसपछि जुम्लाको न्यूनतम तापक्रम ६ डिग्री सेल्सियस थियो । काठमाडौंको न्यूनतम तापक्रम १७.२ डिग्री सेल्सियस मापन गरिएको थियो ।
