उडिशा । उडिशा राज्यको बालासोरमा द्रुत गतिमा हुँइकिएका तीनवटा रेल एकापसमा ठोक्किएर शुक्रबार बेलुका भएको दुर्घटनामा मृत्यु हुनेको संख्या २६१ पुगेको छ । ९०० जनाभन्दा बढी यात्री घाइते भएका छन् ।

दक्षिणपूर्वी रेलवेका अनुसार घाइते यात्रुलाई राज्यको गोपालपुर, खन्तपारा, बालासोर, भद्रक र सोरोका अस्पतालमा भर्ना गरिएको छ । दुर्घटनास्थलमा उद्धार कार्य पूरा भएको र पुनःस्थापनाका काम जारी छ ।

शुक्रबार बेलुका ७ बजे बालासोर जिल्लाको बहानागा बजार स्टेसनमा बैंग्लोर–हावडा सुपरफास्ट एक्सप्रेस, कोरोमन्डल एक्सप्रेस र मालवाहक रेल ठोक्किएका थिए । दुर्घटनामा यात्रुवाहक दुई रेलका १७ डिब्बा पटरीबाट बाहिर धेरै पर पुगेका थिए । क्षतिग्रस्त भएका डिब्बाबाट त्यहाँ फसेका सबैलाई उद्धार गरिएको छ ।

केन्द्रीय रेलमन्त्री अश्विनी वैष्णव आफैँ पुनःस्थापनाको निरीक्षणमा छन् । रेलवे बोर्डका अध्यक्ष, स्वास्थ्य सेवा विभागका महानिर्देशकले घाइते यात्रुको उपचारको निगरानी गरिरहेका छन् । अन्य सबै वरिष्ठ सरकारी अधिकारीले अस्पतालहरूमा घाइते यात्रुको हेरचाह एवम् समन्वय गरिरहेका छन् ।

दुर्घटनास्थलमा औषधिलगायत प्यारामेडिकल स्टाफसहित १०० भन्दा बढी चिकित्सक टोलीलाई परिचालन गरिएको छ । घाइतेहरूलाई सोरो, बालासोर, भद्रक र कटकका अस्पतालहरूमा लैजान २०० भन्दा बढी एम्बुलेन्स परिचालन गरिएको छ ।

उडिशा सरकारले दुर्घटनाका कारण अलपत्र परेका उडिशा र पश्चिम बंगालका यात्रुलाई उनीहरूको गन्तव्यसम्म निःशुल्क यातायात सुविधा उपलब्ध गराउने घोषणा गरेको छ । त्यसका निम्ति दुर्घटनास्थलनजिक ३० बस तयारी अवस्थामा राखिएको छ ।

घाइतेहरूलाई प्रदेशका सरकारी तथा निजी अस्पतालमा निःशुल्क उपचारको व्यवस्था गरिएको छ । रासस/एएनआई