पोखरा । पर्यटकीय नगरी पोखरामा राष्ट्रिय फोटो पत्रकार समूह नेपाल (एनएफपीजे)को ‘साहसिक पर्यटन’ फोटो प्रदर्शनी सुरु भएको छ । पोखरा ग्रान्ड होटलमा सुरु भएको प्रदर्शनी माल्दिभ्सका पर्यटनमन्त्री अब्दुल्लाह मौसुम र नेपाल पर्यटन बोर्डका प्रमुख कार्यकारी अधिकृत धनञ्जय रेग्मीले रिवन काटेर उद्घाटन गरे । 

प्रदर्शनीको उद्घाटन गर्दै माल्दिभ्सका पर्यटनमन्त्री मौसुमले प्रदर्शनीमा फोटो पत्रकारहरुले खिचेका उत्कृष्ट फोटोहरू देखेर निक्कै खुसी लागेको बताए । उनले भने, “म आज यहाँ उपस्थित हुँदा नेपालको सबै ठाउँ पुगेको जस्तो अनुभूति भएको छ ।”

पर्यटन प्रवर्द्धनमा फोटोले महत्वपूर्ण भूमिका खेल्ने भन्दै उनले नेपालका आकर्षक ठाउँहरुको फोटो अवलोकन गर्ने अवसर दिएकोमा आयोजक एनएफपीजेलाई धन्यवाद दिए । एनएफपिजेले मन्त्री मौसुमलाई मायाको चिनो स्वरुप फोटो बुक पनि प्रदान गरेको छ ।

माल्दिभ्सका पर्यटनमन्त्रीसँगै दक्षिण एसियाका विभिन्न विशिष्ट व्यक्तिहरुले उक्त प्रदर्शनी अवलोकन गरेका थिए । (पाटा)सँगको सहकार्यमा आज मंगलबारदेखि सुरु प्रदर्शनी शुक्रबारसम्म ४ दिन चल्नेछ ।

नेपालको आन्तरिक तथा बाह्य पर्यटन प्रवर्ध्दन गर्ने उद्देश्यले देशका विभिन्न स्थानमा खिचिएका उत्कृष्ट पर्यकीय र साहसिक फोटोहरु प्रदर्शनीमा राखिएको कार्यक्रम संयोजक सुनिल शर्माले जानकारी दिए । प्रदर्शनीमा करिब ३० फोटो पत्रकारहरूले खिचेका ६० भन्दा बढी फोटो राखिएको छ ।