काठमाडौं । सहिद स्मारक ‘ए’ डिभिजन लिगमा विभागीय टिम त्रिभुवन आर्मी फुटबल क्लबविरुद्ध न्युरोड टिम (एनआरटी) ले १–० को साँघुरो जित निकालेको छ ।
बुधबार त्रिपुरेश्वरस्थित दशरथ रंगशालामा एनआरटीलाई जित दिलाउन क्रितिशरत्न छुन्जुले निर्णायक गोल गरे । क्रितिशले खेलको ७९औँ मिनेटमा गरेको गोल एनआरटीको जितमा निर्णायक बनेको हो ।
आर्मीविरुद्धको जित निकालेसँगै २१ खेलबाट २६ अंक जोडेको एनआरटी तालिकाको छैटौं स्थानमा उक्लिएको छ । यता, समान खेलबाट २९ अंक जोडेको आर्मी तालिकाको पाँचौ स्थानमा यथावत् छ ।
लिगमा आजै भएको अर्को खेलमा सशस्त्र प्रहरी बलको एपीएफ फुटबल क्लबले संकटा क्लबविरुद्ध २–१ को जित निकाल्यो ।
च्यासल रंगशालामा भएको खेलमा आभास लामिछानेले २५औँ मिनेटमा गरेको गोलबाट एपीएफले अग्रता बनाएको थियो । पहिलो हाफको इन्जुरी समयमा आभासले नै गोल गर्दै एपीएफको अग्रतालाई २–१ मा पुर्याएका थिए ।
खेलको ५०औँ मिनेटमा मनिष डांगीले गोल गरे पनि संकटाको हार टार्न भने सकेनन् ।
जितसँगै २१ खेलबाट २६ अंक जोडेको एपीएफ तालिकाको आठौँ स्थानमा उक्लिएको छ । समान खेलबाट २३ अंक जोडेको संकटा १२औँ स्थानमा छ । संकटा रेलिगेसन क्षेत्रमा रहेको एफसी खुमलटारभन्दा दुई अंकमात्र माथि छ ।
