काठमाडौं । सेन्ट्रल एसियन भलिबल एसोसिएसन (काभा) महिला भलिबल च्यालेन्ज कप–२०२३ मा उज्वेकिस्तानले विजयी सुरुआत गरेको छ ।

सोमबारदेखि सुरु भएको प्रतियोगिताको समूह ‘बी’को पहिलो खेलमा उज्वेकिस्तानले श्रीलंकाविरुद्ध ३–० को सोझो सोटमा जित निकालेको हो ।

त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा निकै प्रतिस्पर्धात्मक बनेको पहिलो सेट २७–२५ ले आफ्नो पक्षमा पारेको उज्वेकिस्तानले त्यसपछिका दुई सेटमा भने सहज जित निकाल्यो । उज्वेकिस्तानले दोस्रो सेटमा २५–२० र तेस्रो सेटमा २५–१४ ले जित निकाल्यो ।

आठ राष्ट्रले प्रतिस्पर्धा गर्ने प्रतियोगिताको समूह ‘बी’मा उज्वेकिस्तान, श्रीलंका, माल्दिभ्स र काजखस्तान छन् । यस्तै, समूह ’ए’ मा नेपाल, कीर्गिस्तान, भारत र बंगलादेश छन् ।