काठमाडौं । भरुवा बन्दुकसहित विभिन्न स्थानबाट चारजना पक्राउ परेका छन् ।

सल्यानको कालिमाटी गाउँपालिका–६, सिरेनीका ५५ वर्षीय प्रेमबहादुर घर्तीलाई भरुवा बन्दुक एकथान र बारुद भर्ने रड एकथानसहित मंगलबार साँझ प्रहरीले नियन्त्रणमा लिएको छ ।

घर्तीले घरनजिकैको जंगलमा भरुवा बन्दुक लुकाइराखेको भन्ने सूचनापछि प्रहरी टोली खटिएको थियो ।

यस्तै, महोत्तरीको बर्दिबास नगरपालिका–११ स्थित वनपथ राष्ट्रिय वनबाट भरुवा बन्दुक दुईथानसहित तीनजना पक्राउ परेको प्रहरीले जनाएको छ ।

सर्लाहीको ईश्वरपुर नगरपालिका–१२ मा बस्दै आएका ३५ वर्षीय लालबहादुर भ्लोनसहित तीनजनालाई मंगलबार साँझ प्रहरीले पक्राउ गरेको हो । उनीहरूले जंगली जनावरको सिकार गरिरहेको भन्ने सूचनापछि प्रहरी टोली खटिएको थियो ।