काठमाडौं । नेपाली कांग्रेसका सांसद दीपक गिरीले आफ्नै पार्टीका सांसद सञ्जय गौतम १५ बुँदे माग राखेर अनशन बसेकामा सरकारको ध्यानाकर्षण गराएका छन् ।

सोमबार प्रतिनिधिसभा बैठकको आकस्मिक समयमा उनले पटक–पटक संसद्मा बोल्दा पनि सुनुवाइ नभएकाले गौतम मात्र होइन, अरू सांसद पनि अनशन बस्नुपर्ने हो ? भन्दै प्रश्न गरे ।

“जब्दीघाटको भत्किएको पुलमुनि सांसद गौतम आमरण अनशन बस्नुभएको छ,” उनले भने, “आफ्नो क्षेत्र र मुलुक विकास होस् भनेर पटक–पटक संसद्मा कुरा उठाउँदा पनि नसुनेपछि अनशन बस्नुपरेको छ । अब अन्य सांसदहरू पनि आफ्ना कुरा सुनुवाइ गर्न अनशन बस्नुपर्ने हो ?”

उनले सांसद गौतमले उठाएका १५ बुँदे माग सम्बोधन गर्न सभामुखमार्फत सरकारलाई आग्रह पनि गरे ।