काठमाडौं । फेरी एक पटक म्यानचेस्टर सिटीका ‘गोल मेसिन’ इर्लिङ ब्राउट हालान्डलाई विपक्षी रक्षापंक्ति रोक्न सफल भयो । तर, जब उनको टिमलाई जादूको क्षण चाहिएको थियो, पुराना भरपर्दा केभिन डे ब्रुयना चम्किए । उनी डी ब्रुयनाले गरेको गोलमा मंगलबार राति सिटीले यूईएफए च्याम्पियन्स लिग सेमिफाइनलको पहिलो लेगमा रियाल मड्रिडबिरूद्ध १–१ को बराबरी खेल्न सफल भएको छ । 

इङ्लिस क्लब सिटीमा हालान्डको यो पहिलो सिजन हो । तर, पहिलो सिजनमै उनको कीर्तिमानी प्रदर्शनले बेल्जियमका ३१ वर्षे मिडफिल्डर डी ब्रुयना छायामा परेका थिए । नर्वेका हालान्डले सबैखाले प्रतियोगितामा गरी ५१ गोल गरिसकेका छन् । तर, इङ्लिस क्लबका रक्षापंक्तिभन्दा रियालका ‘सेन्टर ब्याक’ एन्टोनियो रुडिगर र डेबिड अलाबा फरक देखिए । उनीहरूले हालान्डलाई शान्त राख्न सफल भए । 

यस्तो अवस्थामा डी ब्रुयनाले गोल गर्न सफल भए र सिटीले रियालको घरेलु मैदानमा १–१ को बराबरी खेल्न सफल भयो । स्पेनको मड्रिडस्थित सान्टियानो बेर्नाबेउमा रियालले ३६औँ मिनेटमा भिसियस जुनियरको गोलबाट अग्रता लिन सफल भएको थियो । डी ब्रुयनाले सिटीको लागि आफू किन अपरिहार्य छु भनेर प्रमाणित गर्दै ६७औँ मिनेटमा गोल गरेपछि रियाल बराबरी खेल्न बाँध्य भएको थियो । डी ब्रुयनाले इल्के गुन्डोगनले दिएको ‘ब्याक पास‘मा १८ यार्ड बक्सबाहिरबाट हानेको प्रहारलाई रियालका गोलकिपर थिबाउट कोर्तुवाले ठम्याउन सकेनन् । 

“केभिन हाम्रो लागि एक ठूलो खेलाडी हुन् । हामीलाई सबैभन्दा धेरै आवश्यक परेको समयमा उनले सधैं राम्रो प्रदर्शन गर्छन् । उनी एक महान खेलाडी हुन्,’’ सिटी मिडफिल्डर रोड्रिले डी ब्रुयनाको तारिफ गरे, “हामीले गोलका लागि संघर्ष गरिरहेका थियौँ । किनभने उनीहरूले बल राखिरहेका थिए । डी ब्रुयनाको गोलसँगै हाम्रो आत्मविश्वास बढेको थियो ।’’

सिटीबाट च्याम्पियनस लिगमा डी ब्रुयनाको यो १४औँ गोल हो । यससँगै रियालविरुद्ध च्याम्पियन्स लिगको नकआउट चरणका फरक अवे खेलमा गोल गर्ने डी बुयना पहिलो खेलाडी बनेका छन् । 

यो बराबरीसँगै सिटीले च्याम्पियन्स लिगको फाइनल पुग्ने सम्भावना बलियो बनाएको छ । सिटीले अब दोस्रो लेग आफ्नै घरेलु मैदान इत्तिहाद रंगशालामा खेल्नेछ । जहाँ सिटी यस प्रतियोगितामा पछिल्लो पाँच वर्षदेखी अपराजित छ । रियाल भने कीर्तिमानी १५औँ पटक उपाधि जित्ने अभियानमा छ । 

रियालका चतुर प्रशिक्षक कार्लो एन्सेलोट्टी पहिलो लेग जित्न नसकेकोमा धेरै विचलित देखिएनन् । रियाल र एसी मिलानबाट समान दुई पटक च्याम्पियन्स लिगको उपाधि जित्न सफल प्रशिक्षक एन्सेलोट्टीले थपे, ‘‘हामीले अर्को साता फेरी खेल्नुछ । आज हाम्रो रणनीति राम्रो थियो । उनीहरूसँग बल हुँदा पनि हामी आत्तिएका थिएनौं । दोस्रो पूर्णरुपमा फरक रह्यो । बराबरी भए पनि टिम राम्रो मानसिकतामा छ ।’’

बराबरीमा सिटीका प्रशिक्षक पेप ग्वार्डिओला पनि खुसी देखिएका छन् । सिटी जारी सिजन तीन प्रतियोगिताको उपाधि नजिक छ । च्याम्पियन्स लिगको सेमिफाइनल खेलिरहेको सिटी प्रिमियर लिग र एफए कपको उपाधि नजिक छ । 

‘‘अब यो प्लेअफ जस्तै भयो । कुनै क्षणमा हाम्रो रक्षापंक्ति राम्रो देखियो । र, अलि फरक रूपमा आक्रमण गर्न पनि सफल भयौं,’’ सिटीका प्रशिक्षक पेप ग्वार्डिओलाले भने, ‘‘अलाबा र रुडिगरले हालान्डलाई रोकिरहेका थिए । उनले एकदम कम स्थान पाएका थिए । तर, पनि हामी गोल गर्न सफल भयौं ।’’