पोखरा । गत शनिबार प्रदेशसभाबाट विश्वासको मत पाउन नसकेपछि गण्डकीको मुख्यमन्त्रीबाट पूर्वमुख्यमन्त्री बनेका एमाले प्रदेशसभा सदस्य खगराज अधिकारीले निर्वाचन खर्च विवरण सार्वजनिक गरेका छन् । मंसिर ०४ मा भएको प्रदेशसभा निर्वाचनमा कास्की १ (क) बाट उमेदवार बनेका अधिकारीले १६ लाख ७१ हजार ५४६ रुपैयाँ खर्च गरेको विवरण सार्वजनिक गरेका हुन् ।

निर्वाचन आयोगले यो क्षेत्रमा प्रदेशसभा सदस्यको उमेदवारको लागि बढीमा १७ लाख रुपैयाँ बराबरको खर्च सीमा तोकेको थियो । अधिकारीले भने खर्च सीमाभन्दा २८ हजार ५०० रुपैयाँ कम खर्च गरे ।

सबैभन्दा बढी उनले सवारीसाधनमा खर्च गरेका छन् । सवारीसाधन/इन्धन शीर्षकमा ६ लाख ६४ हजार रुपैयाँ खर्च भएको देखाइएको छ । यस्तै, सञ्चारमाध्यममा उनको खर्च दुई लाख २७ हजार रुपैयाँ रहेको छ । छापा, विद्युतीय र सामाजिक सञ्जालमा उनले उक्त रकम खर्चेका हुन् । 

कार्यालय र प्रतिनिधि व्यवस्थापनमा दुई लाख ७४ हजार, मतदाता नामावली खरिदमा १८ हजार, प्रचार सामग्रीमा एक लाख ५२ हजार खर्च भएको देखाइएको छ । दुई लाख ३० हजार रुपैयाँ उनले गोष्ठी/अन्तरक्रियामा खर्चेका छन् । त्यस्तै, ढुवानीमा ६० हजार र अन्य शीर्षकमा ६ हजार खर्च भएको देखाइएको छ ।

सम्पत्ति : पोखरामा दुई करोडको घर, चन्द्रागिरिमा जग्गा

प्रदेशसभा सदस्य निर्वाचित भएपछि अधिकारी एमाले संसदीय दलको नेता बन्दै पुस २५ गते गण्डकीको मुख्यमन्त्री बने । नेकपा (माओवादी केन्द्र)को समर्थनमा प्रदेश सरकारको नेतृत्वमा पुगेका अधिकारीले माओवादीले समर्थन फिर्ता लिएसँगै कुर्सी गुमाउन पुगे । 

चैत १० गते माओवादी प्रदेश सरकारबाट बाहिरिएपछि त्यसको ३०औँ दिनका दिन वैशाख ९ गते उनले दोस्रोपटक विश्वासको मत मागे, तर पाएनन् । विश्वासको मत नपाएपछि सरकार सम्हालेको १०५औँ दिनमा पूर्वमुख्यमन्त्री बन्न पुगे । 

अधिकारीले विश्वासको मत लिने अघिल्लो दिन आफ्नो सम्पत्ति विवरण सार्वजनिक गरेका थिए । जबकि, मुख्यमन्त्री, मन्त्रीहरुले कार्यभार सम्हालेको ६०औँ दिनभित्र अनिवार्य रुपमा सम्पत्ति विवरण सार्वजनिक गर्नुपर्ने मन्त्रिपरिषद्को आचारसंहिता नै छ ।

आचारसंहिताले तोकेको समयमा सम्पत्ति विवरण सार्वजनिक नभए पनि गण्डकीमा हालसम्म सम्पत्ति विवरण सार्वजनिक गर्ने उनै अधिकारी मात्रै हुन् । मुख्यमन्त्री तथा मन्त्रिपरिषद्को कार्यालयले सार्वजनिक गरेको विवरणअनुसार खगराज अधिकारीको दुई करोडको घर छ ।

उक्त घर पैतृक सम्पत्ति बिक्रीबाट ८० लाख रूपैयाँमा बनाएको र हालको बजारभाउ दुई करोड रूपैयाँ पर्ने उल्लेख गरिएको छ । पोखरा–१२ ढिकालेथरमा रहेको उक्त घर ६ आनामा बनेको छ । उनको जन्मथलो पोखरा–३१ मा आठ ठाउँमा जग्गा छ ।

अधिकारीले २०७८ साल जेठमा प्रभु बैंकबाट ८० लाख रूपैयाँ ऋण लिएर काठमाडौंको चन्द्रागिरि नगरपालिकामा अधिकारीले घडेरी किनेका छन् । यो ऋण उनले श्रीमती रमा पाण्डेको नाममा लिएका छन् । त्यसबाहेक अग्रगामी कृषि फार्ममा श्रीमती रमा पाण्डेको साढे १६ लाख रूपैयाँ र चितवनमा बनिरहेको रिसोर्टमा पनि श्रीमतीकै नाममा २० लाख रूपैयाँ लगानी छ ।

उनीसँग नगद १५ लाख रूपैयाँ छ । अंशबण्डाबाट प्राप्त तीन तोला सुन पनि उनीसँग छ । विभिन्न बैंक र सहकारीमा  अधिकारीको १० लाख रूपैयाँ मौज्दात छ ।

पूर्वमुख्यमन्त्री अधिकारीको गण्डकी विकास बैंकमा दुई हजार ४९७ कित्ता सेयर छ । गाउँको खेतबारीबाट कृषि फसलबाट वार्षिक ६ लाख रूपैयाँ आम्दानी हुने उनले खुलाएका छन् । अधिकारीको २५ लाख रूपैयाँ ऋण पनि छ । तीनजना व्यक्तिसँग ३५ लाख लिएकोमा २०७८ सालमा १० लाख रूपैयाँ तिरेको उनले उल्लेख गरेका छन् ।

सवारीको नाममा उनीसँग एउटा स्कोर्पियो गाडी छ । उनले त्यो गाडी २०७८ साल मंसिरमा किनेका हुन् । आई–२० कार केदार थपिलयाको बेचेर रकम थप गरेर किनेको मुख्यमन्त्रीको विवरणमा उल्लेख छ । थपलिया अधिकारीका साला हुन् ।